എന്നും വിവാഹദിവസത്തെ താരം കല്യാണപ്പെണ്ണ് തന്നെയാണ്. ഹെയർസ്റ്റൈൽ മുതൽ ചെരുപ്പ് വരെ മറ്റുള്ളവരെ ആകർഷിപ്പിക്കുന്ന തരത്തിലായിരിക്കും ഒരുക്കുന്നത്. പെൺകുട്ടികൾ ചർമ പരിപാലനത്തെ കുറിച്ച് ഏറ്റവുമധികം ചിന്തിക്കുന്നത് കല്യാണം അടുക്കുന്ന സമയത്താണ്. മാസങ്ങൾക്ക് മുമ്പ് തന്നെ അതിന്റെ തയാറെടുപ്പുകൾ ആരംഭിച്ചിരിക്കും. മുഖത്തെ പാടുകൾ മാറ്റാനും, കുരുക്കൾ ഇല്ലാതാക്കാനുമൊക്കെ പല വഴികളും അന്വേഷിക്കുകയും അവയൊക്കെ പരീക്ഷിക്കുകയും ചെയ്യും.
വീട്ടിൽ ചില പൊടിക്കൈകൾ പരീക്ഷിക്കുന്നതോടൊപ്പം ബ്യൂട്ടി പാർലറിലും പോകുന്നത് ശീലമാക്കാം. ചർമവും മുടിയും ഒരുപോലെ സംരക്ഷിക്കേണ്ടത് അത്യാന്താപേഷിതമാണ്. പ്രോട്ടീൻ അടങ്ങിയ ആഹാരങ്ങൾ ശീലമാക്കാനും ശ്രമിക്കേണ്ടതുണ്ട്. സൗന്ദര്യ പരിപാലനത്തിന് ശ്രദ്ധിക്കേണ്ട കാര്യങ്ങൾ എന്തൊക്കെയെന്ന് നോക്കാം.
മുഖക്കുരു അകറ്റാം
വിയർപ്പ് മുഖത്ത് തങ്ങി നിൽക്കുന്നതാണ് മുഖക്കുരുവിന് കാരണമാകുന്നത്. മുഖം ഇടയ്ക്കിടയ്ക്ക് കഴുകുന്നത് നല്ലതാണ്. കൂടാതെ സോപ്പ് ഉപയോഗിക്കുന്നതിന് പകരം ഫെയ്സ് വാഷുകൾ ഉപയോഗിച്ച് മുഖം വൃത്തിയാക്കുക. ഇത് മുഖത്ത് മിനുസവും തിളക്കവും ഉണ്ടാകാൻ സഹായിക്കുന്നു. കറ്റാർവാഴയുടെ ജെല്ല് വെള്ളരി ജ്യീസിനൊപ്പം ചേർന്ന് മുഖത്ത് പുരട്ടാവുന്നതാണ്.
മുഖത്തെ കരുവാളിപ്പ് പരിഹരിക്കാം
കറുത്ത പാടുകൾ സ്വാഭാവികമായും എല്ലാവരിലും ഉണ്ടാകാറുണ്ട്. എന്നാൽ കല്യാണത്തിനോ മറ്റ് എന്തെങ്കിലും ഫംങ്ഷനുകളിലോ പങ്കെടുക്കുമ്പോൾ ഇത് വല്ലാതെ അലട്ടാറുണ്ട്. എന്നാൽ എളുപ്പത്തിൽ പരിഹരിക്കാൻ നമുക്ക് സാധിക്കും. പുറത്തിറങ്ങുമ്പോൾ നിർബന്ധമായും സൺസ്ക്രീൻ ഉപയോഗിക്കുക. രാത്രി കിടക്കുന്നതിന് മുമ്പ് തൈര് പുരട്ടികൊടുക്കാവുന്നതാണ്. തുടർന്ന് പത്ത് മിനിറ്റ് കഴിഞ്ഞ കഴുകി കളയാം. ഇത് എല്ലാ ദിവസവും ചെയ്താൽ ഒരു പരിധിവരെ കരുവാളിപ്പ് മാറ്റാനാകും.
കറുത്ത പാടുകൾ മാറ്റാം
ആത്മവിശ്വാസം ഇല്ലാതാക്കുന്ന ഒന്നാണ് മുഖത്തെ കറുത്ത പാടുകൾ. കല്യാണം അടുക്കുമ്പോൾ ഭൂരിഭാഗം പെൺകുട്ടികളുടെയും മനസിൽ വരുന്ന ആശങ്കയാണ് മുഖത്തെ പാടുകൾ മാറ്റാനുള്ള പോംവഴികൾ എന്തൊക്കെയാന്ന ചോദ്യം. കാപ്പിപ്പൊടിയും പാലും പഞ്ചസാരയും നന്നായി ചേർത്ത് മുഖത്ത് പിടിപ്പിക്കുക. ഇത് 15 മിനിറ്റ് കഴിഞ്ഞ് സ്ക്രബ്ബ് ചെയ്ത് കൊണ്ടു കഴുകികളയുക. ഒരാഴ്ച ചെയ്യുമ്പോൾ തന്നെ നല്ല റിസൾട്ട് കിട്ടും.
