ഭാരതത്തിലെ വിവാഹാഘോഷങ്ങളുടെ ലിസ്റ്റിൽ ഇന്ന് നാം കേൾക്കുന്ന ഒന്നാണ് സംഗീത്. നോർത്ത് ഇന്ത്യയിൽ മാത്രം കണ്ടിരുന്ന സംഗീത് ഇന്ന് കേരളത്തിലെ വിവാഹാഘോഷങ്ങളുടെയും ഭാഗമാണ്. വാക്ക് പോലെ തന്നെ സംഗീതം എന്ന് അർത്ഥം വരുന്നതാണ് സംഗീത് ആഘോഷം. വരനും വധുവും സുഹൃത്തുക്കളോടൊപ്പം നൃത്തം ചെയ്യുകയും വിവാഹത്തിന് മുന്നോടിയായി ഒരുമിച്ച് കൂടുകയും ചെയ്യുന്നു.
ഏറെ വ്യത്യസ്തമായി മനോഹരമായ വസ്ത്രം ധരിച്ചായിരിക്കും വരനും വധുവും വേദിയിൽ എത്തുക. വരന്റെയും വധുവിന്റെയും കുടുംബവും ഇവരോടൊപ്പം ഒത്തുകൂടുന്നതോടെ ആഘോഷത്തിന്റെ മാറ്റ് കൂടും. ആഢംബരത്തോടെയും ലളിതമായും ചിലർ സംഗീത് ആഘോഷിക്കാറുണ്ട്. വിവാഹത്തിന് ഒന്നോ രണ്ടോ ദിവസം മുമ്പാണ് സംഗീത് സംഘടിപ്പിക്കുന്നത്.
നോർത്ത് ഇന്ത്യൻ സ്റ്റൈലിലുള്ള വസ്ത്രങ്ങളായിരിക്കും സംഗീത് ആഘോഷത്തിൽ കാണുക. ഡിജെ പാർട്ടിയായാണ് സംഗീത് ആഘോഷിക്കപ്പെടുന്നത്. രാത്രിയുള്ള ആഘോഷമാണ് സംഗീതിന്റെ മറ്റൊരു പ്രത്യേകത. കളർ ലൈറ്റുകൾ വിവിധതരം അലങ്കാര വസ്തുക്കളും നിറഞ്ഞതാണ് ആഘോഷരാവ്. ചിലർ വധുവിന്റെ കൈയ്യിൽ മെഹന്തിയിടുകയും മഞ്ഞളണിയിക്കുകയുമൊക്കെ ചെയ്യും.
രണ്ട് കുടുംബങ്ങൾ തമ്മിലുള്ള ഐക്യത്തിന്റെ സൂചകമാണ് സംഗീത് ആഘോഷം. രുചികരമായ വ്യത്യസ്ത ഭക്ഷണപദാർത്ഥങ്ങളാണ് സംഗീതിൽ ഉപയോഗിക്കുന്നത്. ലഘുഭക്ഷണങ്ങളായിരിക്കും കൂടുതൽ കാണപ്പെടുന്നത്.
ഇന്ത്യയിൽ പഞ്ചാബിലാണ് സംഗീത് കൂടുതലായും ആഘോഷിക്കപ്പെടുന്നത്. എന്നാൽ സമീപനാളുകളിൽ മറ്റ് സംസ്ഥാനങ്ങളിലും സജീവമാകുന്നുണ്ട്. ഇന്ന് കേരളത്തിലും വിവാഹാഘോഷങ്ങളുടെ ഭാഗമാണ് സംഗീത്. എല്ലാ തിരക്കുകളും മാറ്റിവച്ച് മനസ് തുറന്ന് സന്തോഷിക്കാനുള്ള അവസരമാണ് സംഗീതിലൂടെ ഒരുക്കുന്നത്.
