സനാതന ധർമ്മ പ്രകാരം ശുഭകാര്യങ്ങൾക്ക് മുഹൂർത്തം കുറിക്കുന്ന പതിവുണ്ട്. കുഞ്ഞിന്റെ ചോറൂൺ മുതൽ വിവാഹം വരെ മൂഹൂർത്തം നിശ്ചയിക്കാറുണ്ട്. വിവാഹ മുഹൂർത്തം വളരെ കാര്യങ്ങൾ പരിശോധിച്ചതിന് ശേഷമാണ് കുറിക്കുന്നത്. വരന്റെയും വധുവിന്റെയും ജന്മനാളുകളുമായി ബന്ധപ്പെട്ട കാര്യങ്ങൾ പരിഗണിച്ചാണ് ജ്യോതിഷികൾ സമയം നിശ്ചയിക്കുന്നത്. ഏത് ദിവസം, മാസം, ഗ്രഹസ്ഥാനങ്ങൾ എന്നിവയും നോക്കുന്നു. വിവാഹ മുഹൂർത്തം നിർണ്ണയിക്കുമ്പോൾ ശ്രദ്ധിക്കേണ്ട അടിസ്ഥാന കാര്യങ്ങൾ എന്തൊക്കെയാണെന്ന് പരിശോധിക്കാം:
നല്ല നാളുകൾ
വിവാഹത്തിന് അത്യുത്തമം- മകയിരം, രോഹിണി, ചോതി, ഉത്രം
വിവാഹത്തിന് ഉത്തമം- അത്തം, ഉത്രാടം, ഉത്രട്ടാതി, അനിഴം
ഉത്തമമായി കരുതാവുന്നത്- മകം, മൂലം, രേവതി
എന്നാൽ മകം, മൂലം നക്ഷത്രങ്ങളും ആദ്യപാദവും, രേവതിയുടെ അന്ത്യപാദവും വർജിച്ചുള്ള സമയം വേണം വിവാഹത്തിനായി തിരഞ്ഞെടുക്കാൻ. വരന്റെ ജന്മനക്ഷത്രം വിവാഹ മുഹൂർത്തത്തിന് അനുയോജ്യമല്ല വധുവിന്റെ ജന്മനക്ഷത്രം വിവാഹം നാളിന് തടസ്സമല്ല.
ഉത്തമമായ ദിവസം
വിവാഹത്തിന് എല്ലാ ദിവസവും ഉത്തമമായി കണക്കാക്കുന്നു. എന്നാൽ ഞായർ, ചൊവ്വ, ശനി ദിവസങ്ങൾ ഒഴിവാക്കുന്നതും കാണാം. തിങ്കൾ, ബുധൻ, വ്യാഴം, വെള്ളിയും അത്യുത്തമങ്ങളായി കണക്കാക്കുന്നു. വിവാഹം രാത്രിയാണെങ്കിൽ ദിവസം ചിന്തിക്കേണ്ട ആവശ്യമില്ല.
ഒഴിവാക്കേണ്ട മാസങ്ങൾ
മലയാള മാസമാണ് വിവാഹ മുഹൂർത്തത്തിന് പിന്തുടരുന്നത്. വിവാഹത്തിന് ഉത്തരായനകാലം ഉത്തമവും ദക്ഷിണായനകാലം മധ്യമവുമായി കരുതുന്നു. മീനം പകുതി മുതൽ ആ മാസം മുഴുവനും, കർക്കിടകം, കന്നി, കുംഭം, ധനു തുടങ്ങിയ മാസങ്ങളും വിവാഹം നടത്താൻ ഉത്തമങ്ങളല്ല. ഇവ ഒഴിവാക്കണം.
