ദാമ്പത്യം ദൃഢമാകണമെങ്കിൽ ഇരുവരും തമ്മിൽ ഇഴയടുപ്പം വേണം. മാനസികമായ അടുപ്പമുണ്ടാകാൻ വിവാഹത്തിന് മുമ്പ് തന്നെ പരസ്പരം ഇഷ്ടാനിഷ്ടങ്ങൾ മനസ്സിലാക്കുന്നത് നല്ലതാണ്. പ്രധാനമായും ഭാവി ജിവിതത്തെ കുറിച്ചുള്ള സ്വപ്നങ്ങളം പ്രതീക്ഷകളും ചർച്ച ചെയ്യണം. പല ബന്ധങ്ങളും ഡിവോഴ്സിലേക്ക് നീങ്ങുന്നത് ഈ ചർച്ച നടത്താത്തതുകൊണ്ടാണ്. വിവാഹത്തിന് മുമ്പ് നിർബന്ധമായും ചോദിച്ചിരിക്കേണ്ട ആ ചോദ്യങ്ങൾ എന്തൊക്കെയെന്ന് നോക്കാം.
ശമ്പളവും സമ്പാദ്യവും ഒപ്പം കടവും
ഫിനാൻഷ്യൽ പ്ലാനിംഗ് ദാമ്പത്യ ജീവിതത്തിൽ അത്യാവശ്യമാണ്.
ഇതേക്കുറിച്ച് വിവാഹിതരാകാൻ പോകുന്നവർ നേരത്തേ സംസാരിക്കേണ്ടത് അത്യാവശ്യമാണ്. ശമ്പളം, സമ്പാദ്യം എന്നിവയെക്കുറിച്ച് കൃത്യമായ ധാരണ വേണം. പരസ്പരം ഇക്കാര്യങ്ങൾ ചോദിച്ചറിയാൻ മടിക്കേണ്ടതില്ല. കടബാധ്യതകളുണ്ടെങ്കിൽ അതും ചർച്ച ചെയ്യണം. ഭാവിയിൽ ഉണ്ടാകാൻ സാദ്ധ്യതയുള്ള പ്രതിസന്ധികൾ ഒഴിവാക്കാൻ ഇതിലൂടെ സാധിക്കും.
രണ്ടുപേർക്കും ജോലിയുണ്ടെങ്കിൽ ചെലവുകൾ രണ്ടുപേരും തുല്യമായി നോക്കുന്നത് ആരോഗ്യകരമായ ബന്ധത്തിന് സഹായിക്കും. മാത്രമല്ല, ഭാവിയിലേക്കായി ഒരു ജോയിന്റ് അക്കൗണ്ട് തുടങ്ങേണ്ട ആവശ്യമുണ്ടോ എന്നെല്ലാം ചോദിച്ച് മനസിലാക്കുക.
കുഞ്ഞുങ്ങൾ
കുട്ടികൾ വേണമോ വേണ്ടയോ എന്ന കാര്യം നേരത്തേ തന്നെ ചോദിച്ച് മനസിലാക്കണം. കൂടാതെ എത്ര കുട്ടികൾ വേണമെന്ന കാര്യത്തിലും ധാരണയാകാം. കൂടാതെ കുഞ്ഞുണ്ടായ ശേഷം ജോലി എങ്ങനെ മുന്നോട്ട് കൊണ്ടുപോകുമെന്നുമുള്ള കാര്യത്തിൽ പെൺകുട്ടികൾ വ്യക്തത വരുത്തണം.
