ചെന്നൈ: തമിഴ്നാട്ടിൽ പുതുവത്സര ദിനത്തിൽ മിണ്ടാപ്രാണിയോട് ക്രൂരത. തിരുവള്ളൂർ ജില്ലയിൽ പുതുവത്സരദിനത്തിൽ ഗർഭിണിയായ പശുവിനെ വെടിവച്ചു കൊന്നതായി പരാതി. പുലർച്ചെ 4 മണിയോടെയാണ് അതിക്രൂരമായ സംഭവം നടന്നത്. മൃഗസ്നേഹിയായ സായ് വിഘ്നേഷാണ് തിരുവള്ളൂർ പൊലീസിൽ പരാതി നൽകിയത്.
എയർ ഗൺ ഉപയോഗിച്ചാണ് പശുവിനെ ആക്രമിച്ചതെന്നാണ് പ്രാഥമിക നിഗമനം. പശുവിന്റെ പിൻകാലുകളിൽ ഒന്നിലധികം ഗുരുതരമായ പരിക്കുകളുണ്ടായിരുന്നു എന്ന് പരാതിയിൽ പറയുന്നു. ജനുവരി 3 ന് നടത്തിയ എക്സ്-റേ പരിശോധയിൽ പശുവിന്റെ ശരീരത്തിനുള്ളിൽ ഗൺ പെല്ലറ്റുകളുടെ സാന്നിധ്യമുണ്ടെന്ന് കണ്ടെത്തിയിരുന്നു.
ഗൺ പെല്ലറ്റുകൾ ശസ്ത്രക്രിയയിലൂടെ നീക്കം ചെയ്തെങ്കിലും പശുവിനെ രക്ഷിക്കാനായില്ല. എഗട്ടൂരിനടുത്തുള്ള സെലായ് ഗ്രാമത്തിൽ താമസിക്കുന്ന ശാന്തനുകുമാറിന്റേതാണ് പശു. മോഷണശ്രമത്തിനിടെ പശുവിന് വെടിയേറ്റതാകാമെന്നാണ് പരാതിക്കാരന്റെ സംശയം. തിരുവള്ളൂർ പൊലീസ് എഫ്ഐആർ രജിസ്റ്റർ ചെയ്ത് അന്വേഷണം ആരംഭിച്ചിട്ടുണ്ട്.
