വിവാഹശേഷം നവദമ്പതികൾ തമ്മിൽ അടുപ്പം വർധിപ്പിക്കുന്നതിൽ മധുവിധുവിന് വലിയൊരു പങ്കുണ്ട്. തിരക്കുകളിൽ നിന്നും ബഹളങ്ങളിൽ നിന്നും ഒഴിഞ്ഞ് ഇരുവരും മാത്രമായൊരു ഇടം. പണ്ട് മധുവിധു എന്നാൽ സാമ്പത്തികശേഷിയുള്ളവർക്ക് മാത്രം എന്നൊരു ധാരണയുണ്ടായിരുന്നു. എന്നാൽ ഇന്ന് കാഴ്ചപ്പാട് മാറി.
കേരളത്തിനകത്ത്, സ്വന്തം പോക്കറ്റിന് ഒതുങ്ങുന്ന രീതിയിൽ ഹണിമൂൺ പ്ലാൻ ചെയ്യുന്നവരാണ് ഇന്നത്തെ തലമുറ. അത്തരക്കാർക്ക് വയനാട് മികച്ച ഒരു ഓപ്ഷൻ ആയിരിക്കും. കാടും പച്ചപ്പും തണുപ്പും ഒരുപോലെ അനുഗ്രഹിച്ച വയനാട് ഡെക്കാൻ പീഠഭൂമിയുടെ തെക്കേ അറ്റത്താണ് സ്ഥിതി ചെയ്യുന്നത്. വയനാട്ടിലെ പ്രധാന വിനോദസഞ്ചാര കേന്ദ്രങ്ങൾ താഴെ കൊടുക്കുന്നു….
ബാണാസുര അണക്കെട്ട്
വയനാട് ജില്ലയിലെ ബാണാസുര കുന്നുകളുടെ ചരിവുകളിൽ മനോഹരമായ ബാണാസുര സാഗർ അണക്കെട്ട് സ്ഥിതിചെയ്യുന്നു. രാജ്യത്തെ ഏറ്റവും വലിയ ഉൾനാടൻ അണക്കെട്ടും ഏഷ്യയിലെ രണ്ടാമത്തെ വലിയ അണക്കെട്ടുമാണ് ബാണാസുര അണക്കെട്ട്. അണക്കെട്ടിന്റെ മുകളിൽ നിന്ന് വിശാലമായ ജലസംഭരണിയുടെ കാഴ്ച അതിശയകരമാണ്.
വയനാട് വന്യജീവി സങ്കേതം
കേരളത്തിലെ രണ്ടാമത്തെ വലിയ വന്യജീവി സങ്കേതമാണ് വയനാട് വന്യജീവി സങ്കേതം. അപൂർവവും വംശനാശഭീഷണി നേരിടുന്നതുമായ സസ്യജന്തുജാലങ്ങളും ഇവിടെയുണ്ട്. തമിഴ്നാട്ടിലെ മുതുമല, കർണാടകയിലെ നാഗർഹോള, ബന്ദിപ്പൂർ എന്നിവയാലും ചുറ്റപ്പെട്ട ഈ വന്യജീവി സങ്കേതം നീലഗിരി ജൈവമണ്ഡല സംരക്ഷണ കേന്ദ്രത്തിന്റെ അവിഭാജ്യ ഘടകമാണ്.
ചെമ്പ്ര കൊടുമുടി
കൽപ്പറ്റയിൽ നിന്ന് വെറും 8 കിലോമീറ്റർ തെക്കായി മേപ്പാടിയിലാണിത്. വയനാട്ടിലെ ഏറ്റവും ഉയരമുള്ള കൊടുമുടിയാണ്. സമുദ്രനിരപ്പിൽ നിന്ന് 2,000 മീറ്റർ ഉയരത്തിൽ സ്ഥിതി ചെയ്യുന്ന ചെമ്പ്ര കൊടുമുടി, വയനാട് കോഴിക്കോട്, മലപ്പുറം, നീലഗിരി ജില്ലകളിലെ മനോഹരമായ കാഴ്ചകൾ ചെമ്പ്ര കൊടുമുടി പ്രദാനം ചെയ്യുന്നു.
എടക്കൽ ഗുഹകൾ
അതിമനോഹരമായ പാറ കൊത്തുപണികൾക്കും ചുവരുകൾക്കും പേരുകേട്ട എടക്കലിലെ ചരിത്രാതീത ഗുഹകൾ തീർച്ചയായും കണ്ടിരിക്കേണ്ട ഇടമാണ്. ഗുഹകൾക്ക് യഥാക്രമം 96 അടി നീളവും 22 അടി വീതിയും ഉണ്ട്, സമുദ്രനിരപ്പിൽ നിന്ന് 1,200 മീറ്റർ ഉയരവുമുണ്ട്.
വൈത്തിരി
വയനാട് ജില്ലയിലെ ഒരു ചെറിയ പട്ടണമാണ് വൈത്തിരി. ഇടതൂർന്ന മഴക്കാടുകളാൽ ചുറ്റപ്പെട്ട വൈത്തിരി. സുഗന്ധവ്യഞ്ജന തോട്ടങ്ങൾക്കും ആദിവാസി സമൂഹങ്ങൾക്കും പേരുകേട്ട സ്ഥലമാണിത്.
