വൈവാഹിക ആവശ്യങ്ങൾ നടന്നു കിട്ടാൻ വേണ്ടി പ്രാർത്ഥനകളും നേർച്ച കാഴ്ചകളും നടത്തുക പതിവാണ്. അത്തരം പ്രാർത്ഥനകൾക്ക് പ്രത്യേക ഫലം ലഭിക്കുന്ന നിരവധി ക്ഷേത്രങ്ങളുണ്ട്. അത്തരത്തിൽ തമിഴ് നാട്ടിൽ ഉള്ള ഏറെ വിശേഷപ്പെട്ട ഒരു ദിവ്യസങ്കേതമാണ് തിരുമണഞ്ചേരി ഉദ്വാഗനാഥർ ക്ഷേത്രം. തമിഴ്നാട്ടിലെ മയിലാടുതുറൈ ജില്ലയിലെ കാവേരി നദിയുടെ തീരത്ത് തിരുമണഞ്ചേരി എന്ന സ്ഥലത്താണ് ഈ ക്ഷേത്രം നിലനിൽക്കുന്നത്. പ്രധാന പ്രതിഷ്ഠ ശിവനാണ് .മൂർത്തിയെ ഉദ്വാഗനാഥർ എന്ന് വിളിക്കുന്നു. അദ്ദേഹത്തിന്റെ പത്നി കോകിലാംബൾ എന്നാണ് അറിയപ്പെടുന്നത്. ശ്രീ കല്യാണസുന്ദരേശ്വര സ്വാമി ക്ഷേത്രമാണ് ഈ ക്ഷേത്രത്തിന്റെ മറ്റൊരു പേര്.
തമിഴ് ശൈവ നായനാർമാരായ തിരുജ്ഞാനസംബന്ധർ , തിരുനാവുക്കരസർ എന്നിവരുടെ മധ്യകാല തേവാരം കവിതകളിൽ പ്രകീർത്തിക്കപ്പെട്ടിട്ടുള്ള 275 പാടൽ പെട്ര സ്ഥലങ്ങൾ , ശിവ സ്ഥലങ്ങൾ എന്നിവയിൽ ഉൾപ്പെട്ട ഒരു ക്ഷേത്രമാണിത് .
തിരുമണഞ്ചേരി ക്ഷേത്രം അറിയപ്പെടുന്നത് വൈവാഹിക കാര്യങ്ങൾ നടക്കാനുള്ള പ്രത്യേക പൂജയുടെ പേരിലാണ് എന്ന് പറഞ്ഞല്ലോ. അവിവാഹിതരായ പുരുഷന്മാരും സ്ത്രീകളും പ്രധാന മൂർത്തികൾക്ക് പ്രാർത്ഥനയോടെ മാലകൾ അർപ്പിക്കുന്നു. ഈ ക്ഷേത്രത്തിൽ പ്രാർത്ഥിച്ചാൽ അവർക്ക് ഇഷ്ടപ്പെട്ട ഇണയെ ഉടൻ ലഭിക്കുമെന്ന് വിശ്വാസമുണ്ട്. ഇവിടെ നടത്തുന്ന പ്രാർത്ഥന അവരുടെ വിവാഹത്തിന് കാലതാമസം വരുത്തുന്ന എല്ലാ തടസ്സങ്ങളും നീക്കും. കല്യാണ പ്രാർത്ഥനൈ എന്നാണ് ഈ വിശേഷപ്പെട്ട പ്രാർത്ഥനയെ പറയുന്നത് .ദേവി പാർവ്വതി ശിവനെ മാത്രമാണ് വിവാഹം കഴിക്കാൻ ആഗ്രഹിച്ചത്. അതിനായി നടത്തിയ തീവ്രമായ ധ്യാനത്തിനുശേഷം, അവളുടെ പ്രാർത്ഥനകൾക്ക് ഉത്തരം ലഭിച്ചു. ആ ദിവ്യ വിവാഹം നടന്നതിനുശേഷം, അവളുടെ ധ്യാനസ്ഥലം “തിരുമണഞ്ചേരി” എന്നറിയപ്പെട്ടു എന്നാണ് വിശ്വാസം.
കാവേരി നദിക്ക് സമീപമുള്ള ഒരു ഗ്രാമമാണ് തിരുമണഞ്ചേരി. തമിഴ്നാട്ടിലെ മയിലാടുതുറൈ ജില്ലയിലെ കുത്തലം താലൂക്കിൽ കാവേരി നദിക്ക് സമീപമാണ് ഈ ക്ഷേത്രത്തിന്റെ സ്ഥാനം. നിങ്ങൾ ഈ ക്ഷേത്രം സന്ദർശിക്കുമ്പോൾ ഭഗവാൻ നിങ്ങളുടെ വിവാഹ സംബന്ധമായ എല്ലാ പ്രശ്നങ്ങളും പരിഹരിക്കുമെന്ന് വിശ്വസിക്കപ്പെടുന്നു. തിരുമണം എന്നാൽ വിവാഹം എന്നാണ് അർത്ഥമാക്കുന്നത്, അതേസമയം ചേരി എന്നാൽ ഗ്രാമം എന്നാണ് അർത്ഥമാക്കുന്നത്.
ആയിരക്കണക്കിന് ഭക്തർ ഈ ശക്തമായ പൂജ നടത്തി വിവാഹിതരായി എന്നാണ് വിശ്വാസം.
