കോട്ടയം: ജനശതാബ്ദി എക്സ്പ്രസിനു നേരെ കല്ലെറിഞ്ഞ സംഭവത്തിൽ ഇതര സംസ്ഥാന തൊഴിലാളി അറസ്റ്റിൽ.കല്ലേറിൽ യാത്രക്കാരിക്ക് പരിക്കേറ്റിരുന്നു.പിറവം റെയിൽവേ സ്റ്റേഷനിൽവച്ച് ട്രെയിനിന് കല്ലെറിഞ്ഞ കേസിലെ പ്രതി പശ്ചിമ ബംഗാൾ സ്വദേശി പ്രകാശ് ധാലി(26)യെയാണ് കോട്ടയം ആർപിഎഫ് എസ്എച്ച്ഒ എൻ എസ് സന്തോഷിന്റെ നേതൃത്വത്തിലുള്ള സംഘം അറസ്റ്റ് ചെയ്തത്.
മാർച്ച് ആറിന് വൈകിട്ട് ആറരയോടെയാണ് പിറവം റെയിൽവേ സ്റ്റേഷനു സമീപത്തുവച്ച് ട്രെയിനിന്റെ ഡി- 7 കോച്ചിനു നേരെ കല്ലേറുണ്ടായത്. ട്രെയിനിന്റെ ഇടത് ഭാഗത്തുനിന്നാണ് കല്ലേറുണ്ടായത്. കല്ലേറിൽ 104 നമ്പർ സീറ്റിലെ വനിതാ യാത്രക്കാരിക്ക് പരിക്കേറ്റു.ആക്രമണത്തിൽ ഇവരുടെ ഇടത് കൈയ്ക്ക് പരിക്കേറ്റു.
വിവരം ലഭിച്ചതിനെ തുടർന്ന് ട്രാക്കിനു സമീപം ആർപിഎഫ് സംഘം നടത്തിയ പരിശോധനയിൽ റെയിൽവേ ട്രാക്കിനടുത്ത് അനധികൃതമായി നിലയുറപ്പിച്ച രണ്ട് യുവാക്കളിൽ ഒരാൾ അവിടെ നിന്ന് ഓടിരക്ഷപ്പെട്ടിരുന്നു. തുടർന്ന് നടത്തിയ അന്വേഷണത്തിലാണ് അറസ്റ്റ് ഉണ്ടായത്.
