ഗുരുഗ്രാം: ഹരിയാനയിലെ ഗുരുഗ്രാമിൽ ക്രൈം ബ്രാഞ്ചും ഗുണ്ടാസംഘവും തമ്മിലുണ്ടായ വെടിവെയ്പ്പിൽ കുപ്രസിദ്ധ കുറ്റവാളി ദീപക് നന്ദാൽ സംഘത്തിലെ നാല് പേർ കൊല്ലപ്പെട്ടു. സംഘത്തിലെ ഒരാൾക്ക് പരിക്കേറ്റതായും ഏറ്റുമുട്ടലിൽ മൂന്ന് പൊലീസ് ഉദ്യോഗസ്ഥർക്കും വെടിയേറ്റതായും പൊലീസ് അറിയിച്ചു.
സുശാന്ത് ലോക് മേഖലയിലെ ഒരു പ്രമുഖ വ്യവസായിയുടെ വീടിന് നേരെ ആയുധധാരികളായ സംഘം ആക്രമണം നടത്താൻ ശ്രമിക്കുന്നതായി വിവരം ലഭിച്ചതിനെ തുടർന്നാണ് ക്രൈം ബ്രാഞ്ച് സംഘം സ്ഥലത്തെത്തിയത്. പൊലീസ് സംഘത്തെ വളഞ്ഞ് കീഴടങ്ങാൻ ആവശ്യപ്പെട്ടെങ്കിലും പ്രതികൾ പൊലീസിന് നേരെ വെടിയുതിർക്കുകയായിരുന്നുവെന്ന് അധികൃതർ അറിയിച്ചു. തുടർന്ന് നടന്ന തിരിച്ചടിയിലാണ് നാല് പേർ കൊല്ലപ്പെടുകയും ഒരാൾക്ക് പരിക്കേൽക്കുകയും ചെയ്തത്.
വെടിവെയ്പ്പിൽ പരിക്കേറ്റ മൂന്ന് പൊലീസ് ഉദ്യോഗസ്ഥരെ ആശുപത്രിയിൽ പ്രവേശിപ്പിച്ചു. ഇവരുടെ നില തൃപ്തികരമാണെന്ന് അധികൃതർ അറിയിച്ചു. സംഭവസ്ഥലത്ത് നിന്ന് ആധുനിക ആയുധങ്ങൾ ഉൾപ്പെടെ പൊലീസ് പിടിച്ചെടുത്തിട്ടുണ്ട്. ഫോറൻസിക് സംഘം സ്ഥലത്തെത്തി തെളിവുകൾ ശേഖരിച്ചുവരികയാണ്.
വ്യവസായിയുടെ കുടുംബത്തെ സുരക്ഷിതമായി രക്ഷപ്പെടുത്തിയതായും പ്രതികളുടെ തിരിച്ചറിയൽ, ക്രിമിനൽ പശ്ചാത്തലം, പിടിച്ചെടുത്ത ആയുധങ്ങൾ എന്നിവ സംബന്ധിച്ച കൂടുതൽ വിവരങ്ങൾ പരിശോധനയ്ക്ക് ശേഷം പുറത്തുവിടുമെന്നും ഗുരുഗ്രാം പൊലീസ് അറിയിച്ചു.