ന്യൂഡല്‍ഹി: യു.എ.ഇ.യില്‍ നിന്നുള്ള ചരക്കെന്ന വ്യാജേന പാകിസ്താനില്‍ നിന്ന് ഇന്ത്യയിലേക്ക് കടത്താന്‍ ശ്രമിച്ച മൂന്ന് കോടി രൂപ വിലമതിക്കുന്ന ഉണങ്ങിയ ഈന്തപ്പഴം ഡയറക്ടറേറ്റ് ഓഫ് റവന്യൂ ഇന്റലിജന്‍സ് (ഡി.ആര്‍.ഐ.) പിടികൂടി. 13 കണ്ടെയ്നറുകളിലായി എത്തിയ 364 മെട്രിക് ടണ്‍ ഈന്തപ്പഴമാണ് ഗുജറാത്തിലെ കാണ്ട്ല തുറമുഖത്ത് നടത്തിയ പരിശോധനയില്‍ കണ്ടെത്തിയത്.
പ്രാഥമിക അന്വേഷണത്തില്‍, പാകിസ്താനില്‍ നിന്ന് പുറപ്പെട്ട ചരക്ക് ആദ്യം ദുബായിലെത്തിക്കുകയും, തുടര്‍ന്ന് മറ്റൊരു കണ്ടെയ്നറിലേക്ക് മാറ്റിയശേഷം ഉത്ഭവ രാജ്യം യു.എ.ഇ.യാണെന്ന് തെറ്റായി രേഖപ്പെടുത്തി ഇന്ത്യയിലേക്ക് അയച്ചതായും ഡി.ആര്‍.ഐ. കണ്ടെത്തി. കഴിഞ്ഞയാഴ്ചയും സമാന രീതിയിലുള്ള മറ്റൊരു കടത്ത് ശ്രമം ഡി.ആര്‍.ഐ. തടഞ്ഞിരുന്നു. തൂത്തുക്കുടി തുറമുഖം വഴി സോമാലിയയില്‍ നിന്നുള്ള പ്രകൃതിദത്ത റെസിന്‍ എന്ന വ്യാജേന കടത്താന്‍ ശ്രമിച്ച 1.4 കോടി വിലമതിക്കുന്ന 14 മെട്രിക് ടണ്‍ ‘ഗുഗ്ഗുള്‍ റെസിന്‍’ പിടിച്ചെടുത്തിരുന്നു.
അന്വേഷണത്തില്‍, ദുബായ് വഴി എത്തിയ ആ ചരക്കും പാകിസ്താനില്‍ നിന്നുള്ളതാണെന്ന് തെളിഞ്ഞതിനെ തുടര്‍ന്ന് രണ്ടുപേരെ അറസ്റ്റ് ചെയ്തിരുന്നു. പഹല്‍ഗാം ഭീകരാക്രമണത്തിന് പിന്നാലെ ഇന്ത്യ പാകിസ്താനുമായുള്ള നേരിട്ടുള്ള വ്യാപാരം അവസാനിപ്പിച്ചിരുന്നു. തുടര്‍ന്ന് മൂന്നാം രാജ്യങ്ങള്‍ വഴി പാകിസ്താന്‍ ഉത്പന്നങ്ങള്‍ ഇന്ത്യയിലെത്തിക്കാനുള്ള ശ്രമങ്ങള്‍ വര്‍ധിച്ചതോടെ, 2025 മേയ് മുതല്‍ പാകിസ്താനില്‍ നിന്നുള്ള നേരിട്ടുള്ളതും പരോക്ഷമായതുമായ എല്ലാ ഇറക്കുമതികള്‍ക്കും ഇന്ത്യ സമ്പൂര്‍ണ നിരോധനം ഏര്‍പ്പെടുത്തിയിരുന്നു.
നിരോധനത്തിന് മുമ്പ് ഇന്ത്യയില്‍ നിന്ന് സോയാബീന്‍, പച്ചക്കറികള്‍, ചുവന്ന മുളക്, പ്ലാസ്റ്റിക് ഉത്പന്നങ്ങള്‍ എന്നിവ പാകിസ്താനിലേക്ക് കയറ്റുമതി ചെയ്തിരുന്നു. അതേസമയം ഈന്തപ്പഴം, ഡ്രൈ ഫ്രൂട്‌സ്, ജിപ്‌സം, സിമന്റ് തുടങ്ങിയവയാണ് പ്രധാനമായും പാകിസ്താനില്‍ നിന്ന് ഇന്ത്യ ഇറക്കുമതി ചെയ്തിരുന്നത്. സംഭവത്തില്‍ കൂടുതല്‍ അന്വേഷണം ഡി.ആര്‍.ഐ. തുടരുകയാണ്.
