ലണ്ടന്‍: പ്രീമിയര്‍ ലീഗ് കിരീടം നിലനിര്‍ത്താനുള്ള ആഴ്‌സണലിന്റെ പോരാട്ടത്തിന് ഗംഭീര തുടക്കം. എമിറേറ്റ്‌സ് സ്റ്റേഡിയത്തില്‍ പുതുതായി പ്രീമിയര്‍ ലീഗിലേക്ക് തിരിച്ചെത്തിയ കോവന്‍ട്രി സിറ്റിയെ 3-0ന് തകര്‍ത്താണ് മിക്കല്‍ ആര്‍ട്ടെറ്റയുടെ സംഘം സീസണിലെ ആദ്യ മത്സരം വിജയിച്ചത്. മത്സരത്തിന്റെ തുടക്കം മുതല്‍ പൂര്‍ണ ആധിപത്യം പുലര്‍ത്തിയ ആഴ്‌സണല്‍ ആദ്യ പകുതിയില്‍ തന്നെ രണ്ട് ഗോളിന്റെ ലീഡ് സ്വന്തമാക്കി. 15-ാം മിനിറ്റിലായിരുന്നു ആദ്യ ഗോള്‍. റിക്കാര്‍ഡോ കലാഫിയോറിയുടെ ക്രോസ് സ്വീകരിച്ച കായ് ഹാവെര്‍ട്‌സ് ബോക്‌സിന്റെ അരികില്‍ നിന്ന് മനോഹരമായ ഫിനിഷിലൂടെ പന്ത് വലയിലെത്തിച്ചു.
എട്ട് മിനിറ്റിന് പിന്നാലെ ആഴ്‌സണല്‍ ലീഡ് ഇരട്ടിയാക്കി. പുതിയ സൈനിംഗ് ക്രിസ്റ്റോസ് സോലിസ് അരങ്ങേറ്റ മത്സരത്തില്‍ തന്നെ തിളങ്ങി. ഡെക്ലന്‍ റൈസില്‍ നിന്ന് പന്ത് സ്വീകരിച്ച സോലിസ് ഇടതുവശത്ത് നിന്ന് നല്‍കിയ ലോ ക്രോസ് കോവന്‍ട്രി ഗോള്‍കീപ്പര്‍ കാള്‍ റഷ്വര്‍ത്ത് തടുത്തെങ്കിലും പന്ത് ബുകായോ സാകയുടെ മുന്നിലെത്തി. പിഴവില്ലാതെ സാക പന്ത് വലയിലെത്തിച്ചു. 25 വര്‍ഷത്തെ ഇടവേളയ്‌ക്ക് ശേഷം പ്രീമിയര്‍ ലീഗിലേക്ക് തിരിച്ചെത്തിയ കോവന്‍ട്രിക്ക് മത്സരത്തില്‍ കാര്യമായ സ്വാധീനം ചെലുത്താനായില്ല. ആദ്യ പകുതി അവസാനിക്കുന്നതിന് തൊട്ടുമുമ്പ് റയാന്‍ റയയുടെ ഗോള്‍മുഖത്തേക്ക് അപകടകരമായ ഓവര്‍ഹെഡ് കിക്ക് എത്തിയെങ്കിലും ആഴ്‌സണല്‍ ഗോള്‍കീപ്പര്‍ രക്ഷപ്പെടുത്തി.
രണ്ടാം പകുതി തുടങ്ങി നാല് മിനിറ്റിനുള്ളില്‍ ആഴ്‌സണല്‍ മൂന്നാം ഗോളും നേടി. ക്യാപ്റ്റന്‍ മാര്‍ട്ടിന്‍ ഒഡെഗാര്‍ഡിന്റെ ഷോട്ട് റഷ്വര്‍ത്തിന്റെ ദിശ തെറ്റിച്ച് വലയിലെത്തുകയായിരുന്നു. തുടര്‍ന്നും കൂടുതല്‍ ഗോളുകള്‍ക്കായി ആഴ്‌സണല്‍ ശ്രമിച്ചെങ്കിലും നാലാം ഗോള്‍ നേടാനായില്ല. മത്സരത്തിന്റെ അവസാന ഘട്ടത്തില്‍ കോവന്‍ട്രിക്ക് ആശ്വാസഗോളിന് അവസരം ലഭിച്ചെങ്കിലും ജാക്ക് റുഡോണിയുടെ ഹെഡര്‍ നേരെ റയയുടെ കൈകളിലെത്തി.
