ന്യൂഡല്ഹി: ഇന്ത്യയും ജപ്പാനും തമ്മിലുള്ള നയതന്ത്ര ബന്ധത്തിന്റെ 75-ാം വാര്ഷികാഘോഷങ്ങളുടെ ഭാഗമായി സെപ്റ്റംബര് 22ന് ജപ്പാനില് ഇന്ത്യ-ജപ്പാന് ടി20 മത്സരം. ചരിത്രത്തിലാദ്യമായാണ് ഇന്ത്യന് പുരുഷ ക്രിക്കറ്റ് ടീം ജപ്പാനില് ടി20 മത്സരം കളിക്കുന്നത്. ‘സുസുക്കി കപ്പ്’ എന്ന പേരില് നടക്കുന്ന ഏക മത്സരം സാനോ ഇന്റര്നാഷണല് ക്രിക്കറ്റ് ഗ്രൗണ്ടിലാണ് നടക്കുക. ‘സ്പോര്ട്ട് 75’ എന്ന പരിപാടിയുടെ ഉദ്ഘാടന മത്സരമായും ഇന്ത്യ-ജപ്പാന് പോരാട്ടം മാറും. ജപ്പാന് ക്രിക്കറ്റ് അസോസിയേഷനാണ് മത്സരത്തിന്റെ വിവരങ്ങള് സ്ഥിരീകരിച്ചത്.
ജപ്പാന് പ്രധാനമന്ത്രി സനേ തകായിച്ചിയും പ്രധാനമന്ത്രി നരേന്ദ്ര മോദിയും തമ്മിലുള്ള ഉച്ചകോടിക്കിടെ ഉണ്ടായ ധാരണയുടെ ഭാഗമായാണ് മത്സരം സംഘടിപ്പിക്കുന്നതെന്ന് ജപ്പാന് ക്രിക്കറ്റ് അസോസിയേഷന് അറിയിച്ചു. 2036ലെ ഒളിമ്പിക്സ്, പാരാലിമ്പിക്സ് മത്സരങ്ങള്ക്ക് ആതിഥേയത്വം വഹിക്കാനുള്ള ഇന്ത്യയുടെ താല്പര്യവും ഈ നീക്കത്തിന് കൂടുതല് പ്രാധാന്യം നല്കുന്നു. ജപ്പാനില് ക്രിക്കറ്റിന്റെ വളര്ച്ചയ്ക്ക് ഇന്ത്യയുടെ വരവ് നിര്ണായകമാകുമെന്ന് ജപ്പാന് ക്രിക്കറ്റ് അസോസിയേഷന് സിഇഒ നയോകി മിയാജി പറഞ്ഞു.
നിലവിലെ ക്രിക്കറ്റ് ആരാധകര്ക്കൊപ്പം ജപ്പാനില് ക്രിക്കറ്റിനെക്കുറിച്ച് കൂടുതല് അറിയാന് ആഗ്രഹിക്കുന്നവരും മത്സരം കാണാനെത്തണമെന്ന് അദ്ദേഹം ആഹ്വാനം ചെയ്തു. ലോക ചാമ്പ്യന്മാരായ ഇന്ത്യന് ടീമിനെ ജപ്പാനിലെ ക്രിക്കറ്റിന്റെ വേദിയിലെത്തിക്കാന് കഴിയുന്നത് തങ്ങളുടെ അസോസിയേഷന് ചരിത്രനിമിഷമാണെന്ന് മിയാജി പറഞ്ഞു. ഇന്ത്യന് ക്രിക്കറ്റ് ആരാധകരുടെ ആവേശത്തോടെ ജപ്പാനിലെ മത്സരം അവിസ്മരണീയമാകുമെന്ന് പ്രതീക്ഷിക്കുന്നതായും അദ്ദേഹം വ്യക്തമാക്കി.
ഇന്ത്യന് ടീമിന് പുതിയൊരു ക്രിക്കറ്റ് മേഖലയിലേക്ക് എത്താനും ജപ്പാനിലും കിഴക്കന് ഏഷ്യയിലും ക്രിക്കറ്റിന് കൂടുതല് ആരാധകരെ സൃഷ്ടിക്കാനും മത്സരം സഹായിക്കുമെന്ന് ബിസിസിഐ സെക്രട്ടറി ദേവജിത് സൈകിയ പറഞ്ഞു. ജപ്പാനില് ക്രിക്കറ്റിന്റെ വികസനത്തിനായി ജപ്പാന് ക്രിക്കറ്റ് അസോസിയേഷനുമായി ചേര്ന്ന് പ്രവര്ത്തിക്കുമെന്നും ബിസിസിഐ വ്യക്തമാക്കി. സെപ്റ്റംബര് 22ലെ ജപ്പാനെതിരായ മത്സരം ഇന്ത്യയുടെ ഏഷ്യന് ഗെയിംസ് ഒരുക്കങ്ങള്ക്ക് മുന്നോടിയായുള്ള സന്നാഹ മത്സരമാകാന് സാധ്യതയുണ്ട്.
മികച്ച റാങ്കിംഗിന്റെ ആനുകൂല്യത്തില് ശ്രേയസ് അയ്യര് നയിക്കുന്ന ഇന്ത്യന് ടീമിന് ഏഷ്യന് ഗെയിംസില് നേരിട്ട് ക്വാര്ട്ടര് ഫൈനല് പ്രവേശനം ലഭിച്ചിട്ടുണ്ട്. സെപ്റ്റംബര് 28നാണ് ഇന്ത്യയുടെ ക്വാര്ട്ടര് ഫൈനല് മത്സരം. ജപ്പാനെതിരായ പോരാട്ടത്തിന് ആറ് ദിവസത്തിന് ശേഷമായിരിക്കും ഇത്.