മലപ്പുറം: ഷോർട്ട് സർക്യൂട്ടിനെ തുടർന്ന് തീപിടിച്ച ചുമർഫാൻ കട്ടിലിലേക്ക് വീണ് പൊള്ളലേറ്റ അഞ്ചുമാസം പ്രായമുള്ള കുഞ്ഞ് മരിച്ചു. തിരുവാലി കുളക്കാട്ടിരിയിൽ താമസിക്കുന്ന എറണാകുളം കാലടി മഞ്ഞപ്ര സ്വദേശി പന്നികശ്ശേരി സജീവിന്റെ മകൾ ശ്രീഭദ്രയാണ് മരിച്ചത്.
കഴിഞ്ഞദിവസം വൈകിട്ട് നാലേകാലോടെയാണ് സംഭവം.
കുട്ടിയെ വീട്ടിനുള്ളിലെ കട്ടിലിൽ ഉറക്കിക്കിടത്തി സജീവും ഭാര്യയും ഫാമിൽ ജോലിക്ക് പോയിരിക്കുകയായിരുന്നു. ഇതിനിടെയാണ് വീട്ടിൽനിന്ന് പുക ഉയരുന്നത് ശ്രദ്ധയിൽപ്പെട്ടത്. ഓടിയെത്തി പരിശോധിച്ചപ്പോഴാണ് ചുമർഫാൻ ഉരുകി കട്ടിലിലേക്ക് വീണ് കുഞ്ഞിന് പൊള്ളലേറ്റ നിലയിൽ കണ്ടെത്തിയത്.
ഉടൻ കുഞ്ഞിനെ മഞ്ചേരി ഗവ. മെഡിക്കൽ കോളേജ് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
തീപിടിത്തത്തിൽ മെത്ത കത്തിക്കരിഞ്ഞ നിലയിലാണ്. കട്ടിലും ഭാഗികമായി നശിച്ചിട്ടുണ്ട്. ഷോർട്ട് സർക്യൂട്ടാണ് തീപിടിത്തത്തിന് കാരണമെന്നാണ് ലഭിക്കുന്ന വിവരം.
സംഭവത്തിൽ എടവണ്ണ പൊലീസ് അസ്വാഭാവിക മരണത്തിന് കേസെടുത്തു.