കോട്ടയം: ശുചിത്വം ജനകീയ പങ്കാളിത്ത പ്രസ്ഥാനമാക്കുകയെന്ന ലക്ഷ്യത്തോടെ കേന്ദ്രസർക്കാർ നടപ്പാക്കുന്ന ‘സ്വച്ഛതാ ഹി സേവ’ ക്യാമ്പയിന്റെ ഭാഗമായി കോട്ടയത്ത് റബർ ബോർഡിന്റെ നേതൃത്വത്തിൽ വിപുലമായ ശുചീകരണ പ്രവർത്തനങ്ങൾക്കും ശുചിത്വബോധവത്കരണ പരിപാടികൾക്കും തുടക്കമായി.
റബർ ബോർഡ് ആസ്ഥാനത്തിന് മുന്നിൽ മാവിൻതൈ നട്ടാണ് ശുചീകരണ പ്രവർത്തനങ്ങളുടെ ഔപചാരിക ഉദ്ഘാടനം റബർ ബോർഡ് ചെയർമാൻ എൻ. ഹരി നിർവഹിച്ചത്. വ്യക്തിശുചിത്വത്തിനൊപ്പം സ്ഥാപനങ്ങളുടെയും ഓഫീസുകളുടെയും ശുചിത്വവും കാര്യക്ഷമതയും ഉറപ്പാക്കേണ്ടതിന്റെ പ്രാധാന്യം അദ്ദേഹം ചൂണ്ടിക്കാട്ടി.
എല്ലാ വ്യക്തികളിലും ശുചിത്വ അവബോധം സൃഷ്ടിക്കുക എന്ന വിശാലമായ ലക്ഷ്യത്തോടെയാണ് കേന്ദ്രസർക്കാർ ഇത്തവണത്തെ ശുചിത്വ വാരാചരണം സംഘടിപ്പിക്കുന്നതെന്ന് എൻ. ഹരി പറഞ്ഞു. വ്യക്തിജീവിതത്തിന്റെയും ഔദ്യോഗിക പ്രവർത്തനത്തിന്റെയും ഭാഗമാക്കി ശുചിത്വത്തെ മാറ്റണമെന്നും അദ്ദേഹം വ്യക്തമാക്കി.
ഓഫീസ് പരിസരം വൃത്തിയായി സൂക്ഷിക്കുക, അനാവശ്യ വസ്തുക്കൾ നീക്കം ചെയ്യുക, രേഖകളും ഫയലുകളും ക്രമീകരിക്കുക, ഫയലുകൾ വേഗത്തിൽ തീർപ്പാക്കുക തുടങ്ങിയ പ്രവർത്തനങ്ങൾക്കും വാരാചരണത്തിൽ പ്രാധാന്യം നൽകും. വ്യക്തിശുചിത്വത്തോടൊപ്പം ഓരോരുത്തരുടെയും ഇരിപ്പിടവും മേശയും ഉൾപ്പെടെയുള്ള ഓഫീസ് ഇടങ്ങളും വൃത്തിയായി സൂക്ഷിക്കുകയാണ് ലക്ഷ്യം.
സബ് ജയിലിന് മുന്നിൽ പൂന്തോട്ടം
റബർ ബോർഡ് ആസ്ഥാനത്തുനിന്ന് കോട്ടയം സബ് ജയിൽ പരിസരം വരെയാണ് ആദ്യഘട്ട ശുചീകരണ പ്രവർത്തനങ്ങൾ നടത്തിയത്. സബ് ജയിലിന് സമീപമുള്ള പ്രദേശം വൃത്തിയാക്കിയതിന് പുറമെ ജയിലിന് മുന്നിൽ അലങ്കാരച്ചെടികൾ നട്ട് പൂന്തോട്ടവും ഒരുക്കി.
സി.എം.എസ്. കോളേജ്, ബി.സി.എം. കോളേജ് എന്നിവിടങ്ങളിലെ എൻ.എസ്.എസ്. വോളണ്ടിയർമാർക്കൊപ്പം റബർ ബോർഡ് ഉദ്യോഗസ്ഥരും ജീവനക്കാരും ശുചീകരണ പ്രവർത്തനങ്ങളിൽ പങ്കെടുത്തു.
രാവിലെ ഏഴിന് നടന്ന പരിപാടിയിൽ റബർ ബോർഡ് എക്സിക്യൂട്ടീവ് ഡയറക്ടർ എം. വസന്ത ഗേശൻ പ്രവർത്തനങ്ങളുടെ ഉദ്ദേശലക്ഷ്യങ്ങൾ വിശദീകരിച്ചു. ‘സ്വച്ഛതാ ഹി സേവ’യുടെ സന്ദേശം ഒരു ദിവസത്തെ പ്രവർത്തനത്തിൽ ഒതുങ്ങാതെ ജീവിതത്തിന്റെ ഭാഗമാക്കണമെന്ന് അദ്ദേഹം പറഞ്ഞു.
ഒരാഴ്ച നീളുന്ന വിവിധ പ്രവർത്തനങ്ങൾ
പൊതുസ്ഥലങ്ങളുടെ ശുചീകരണം, മാലിന്യനിർമാർജനം, പരിസരസംരക്ഷണം എന്നിവയ്‌ക്കൊപ്പം സ്ഥാപനത്തിനകത്തെ ശുചിത്വവും കാര്യക്ഷമതയും ഉറപ്പാക്കുന്നതിനുള്ള നടപടികളും ഒരാഴ്ച നീളുന്ന പരിപാടിയുടെ ഭാഗമായി നടപ്പാക്കും.
തുടർന്നുള്ള ദിവസങ്ങളിൽ റബർ ബോർഡ് ആസ്ഥാനം കേന്ദ്രീകരിച്ച് ഫയൽ തീർപ്പാക്കൽ, ഓഫീസ് മുറികളുടെ ശുചീകരണം, അനാവശ്യ വസ്തുക്കളുടെ നീക്കം, പരിസര ശുചീകരണം തുടങ്ങിയ പ്രവർത്തനങ്ങൾ നടത്തും.
ഗാന്ധിജയന്തിയോടനുബന്ധിച്ച് ശുചിത്വം ജീവിതശൈലിയുടെ ഭാഗമാക്കുകയും പൊതുസ്ഥലങ്ങളുടെ സംരക്ഷണത്തിൽ ജനപങ്കാളിത്തം ഉറപ്പാക്കുകയും ചെയ്യുക എന്ന ലക്ഷ്യത്തോടെയാണ് രാജ്യവ്യാപകമായി ‘സ്വച്ഛതാ ഹി സേവ’യുടെ ഭാഗമായി വിവിധ പ്രവർത്തനങ്ങൾ സംഘടിപ്പിക്കുന്നത്.