മണ്ണാർക്കാട്: പ്രായപൂർത്തിയാകാത്ത ബംഗാളി പെൺകുട്ടിയുമായി കേരളത്തിലെത്തി ഒളിവിൽ കഴിഞ്ഞ കേസിലെ പ്രതി പൊലീസിനെ വെട്ടിച്ച് രക്ഷപ്പെട്ടു. പശ്ചിമ ബംഗാൾ സൗത്ത് 24 പർഗാനാസ് രാംഷർപൂർ സ്വദേശി അബ്ദുല്ല മൊല്ല (23) ആണ് മണ്ണാർക്കാട് കോടതിയിൽ നിന്ന് രക്ഷപ്പെട്ടത്.
ബംഗാളിൽ നിന്ന് പെൺകുട്ടിയുമായി അലനല്ലൂരിലെത്തിയ അബ്ദുല്ല ഇവിടെ ഒളിവിൽ കഴിയുകയായിരുന്നു. തുടർന്ന് കേരളത്തിലെത്തിയ ബംഗാൾ പൊലീസ് ഇയാളെയും പെൺകുട്ടിയെയും കണ്ടെത്തി കസ്റ്റഡിയിലെടുത്തു. മണ്ണാർക്കാട് കോടതിയിൽ ഇരുവരെയും ഹാജരാക്കി ബംഗാളിലേക്ക് കൊണ്ടുപോകുന്നതിനായി ട്രാൻസിറ്റ് വാറണ്ട് നേടിയിരുന്നു. നടപടികൾ പൂർത്തിയാക്കി ബംഗാളിലേക്ക് മടങ്ങാനുള്ള തയ്യാറെടുപ്പിനിടെയാണ് അബ്ദുല്ല പൊലീസിന്റെ കസ്റ്റഡിയിൽ നിന്ന് രക്ഷപ്പെട്ടത്.
സംഭവത്തിൽ മണ്ണാർക്കാട് പൊലീസ് അന്വേഷണം ഊർജിതമാക്കി. പ്രതിക്കായി വിവിധ സ്ഥലങ്ങളിൽ തിരച്ചിൽ തുടരുകയാണ്.