കൊല്ലം: തിരുവിതാംകൂർ ദേവസ്വം ബോർഡിന്റെ മേജർ ക്ഷേത്രത്തിന്റെ ദുരവസ്ഥ പങ്ക് വച്ച് വിഎച്ച്പി സംസ്ഥാന ജനറൽ സെക്രട്ടറി അഡ്വ. അനിൽ വിളയിൽ. ചവറ ടൈറ്റാനിയം ജംഗ്ഷനിലെ ഓലക്കാട്ടുവിള വനദുർഗാ ദേവി ക്ഷേത്രമാണ് അതീവ ദയനീയമായ സ്ഥിതിയിലുള്ളത്. തകർന്ന ക്ഷേത്രത്തിനറെ ചിത്രവും അദ്ദേഹം ഫേസ്ബുക്ക് പോസ്റ്റിൽ പങ്കുവെച്ചിട്ടുണ്ട്. പുരാതനമായ ദേവീവിഗ്രഹം സ്ഥിതി ചെയ്യുന്ന ക്ഷേത്രത്തിന്റെ സംരക്ഷണത്തിൽ ദേവസ്വം ബോർഡ് പൊറുക്കാൻ ആവാത്ത വീഴ്ചയാണ് സംഭവിച്ചതെന്ന് ചിത്രത്തിൽ നിന്നും വ്യക്തമാകുന്നുണ്ട്. പന്മന കണിച്ചുകുളങ്ങര ശ്രീ അന്നപൂർണേശ്വരി ക്ഷേത്രത്തിന് സമീപമാണ് ഓലക്കാട്ടുവിള വനദുർഗാ ദേവി ക്ഷേത്രം സ്ഥിതി ചെയ്യുന്നത്. 215 സെന്റ് ഭൂമിയുണ്ടായിരുന്ന ക്ഷേത്രത്തിന് ഇപ്പോൾ രേഖകളിൽ രണ്ടുസെന്റിൽ താഴെ ഭൂമി മാത്രമാണ് അവശേഷിക്കുന്നത്.
അഡ്വ. അനിൽ വിളയിലിന്റെ ഫേസ്ബുക്ക് പോസ്റ്റ്
തിരുവിതാംകൂർ ദേവസ്വം ബോർഡിന്റെ ഒരു “മേജർ ” ക്ഷേത്രം കാണുക
ഇത് കാണാൻ ജയകുമാർ സാറിന് കണ്ണ് പിടിക്കുമോ എന്തോ…
ചവറ ടൈറ്റാനിയം ജംഗ്ഷനിൽ ദേവസ്വം ബോർഡിന്റെ വകയായ പുരാതന ക്ഷേത്രം, പേര് -ഓലക്കാട്ടു വിള വനദുർഗ്ഗാ ദേവി ക്ഷേത്രം (പന്മന കണിച്ചു കുളങ്ങര ശ്രീ അന്നപൂർണ്ണേശ്വരി ക്ഷേത്രത്തിനു സമീപം) ക്ഷേത്രത്തിലേക്കുള്ള വഴി പരിസരവാസികൾ കൈയ്യേറി. ക്ഷേത്രത്തിലേക്ക് വഴിയില്ല. പന്മന പഞ്ചായത്ത് സെക്രട്ടറി, കരുനാഗപ്പള്ളി ദേവസ്വം അസി: കമ്മീഷണർ, കാമൻകുളങ്ങര സബ് ഗ്രൂപ്പ് ഓഫീസർ,തിരുവിതാംകൂർ ദേവസ്വം കമ്മീഷണർ / പ്രസിഡന്റ് എന്നിവരോട് പരാതിപ്പെട്ടു, ഒരു ഫലവുമുണ്ടായില്ല.
ക്ഷേത്രത്തിന്റെ മുൻഭാഗം ഇടിഞ്ഞു വീണു. അതിലാണ് പുരാതനമായ ദേവി വിഗ്രഹം ഇരിക്കുന്നത്. തിരുവിതാംകൂർ ദേവസ്വം ബോർഡിന്റെ അനാസ്ഥ കൊണ്ട് നൂറ്റാണ്ടുകൾ പഴക്കമുള്ള ഈ ക്ഷേത്രവും, അത്യപൂർവവും ചൈതന്യവത്തായതുമായ ദേവി വിഗ്രഹം അനാഥമായിക്കിടന്നു നശിക്കുന്നു.
ഈ ക്ഷേത്രത്തിന് 215 സെൻറ് ഭൂമിയുണ്ടായിരുന്നു എന്നാണ് പറയുന്നത്. ഇപ്പോൾ രേഖകളിൽ രണ്ടു സെൻറിൽ കുറവു മാത്രം. അവിടേക്കുള്ള വഴി പോലും പരിസരവാസികൾ കൈയ്യേറി. ദേവസ്വം ബോർഡിന്റെ കരുനാഗപ്പെള്ളി ഗ്രൂപ്പിൽ, കാമൻകുളങ്ങര ദേവസ്വം സബ് ഗ്രൂപ്പ് ഓഫീസറുടെ കീഴിലുള്ള ക്ഷേത്രമാണ്. ഇതാണ് ദേവസ്വം ബോർഡിന്റെ ഭരണ നിർവ്വഹണം ….. ഇതാണ് ദേവസ്വം ബോർഡ് ക്ഷേത്രങ്ങളുടെ അവസ്ഥ
