ദുബായ്: ഫ്ലൈദുബായ് വിമാനത്തിലെ ഭീകരാക്രമണത്തിൽ കൂടുതൽ വിവരങ്ങൾ പുറത്ത്. ഗുരുതരമായി പരിക്കേറ്റ് കിടന്ന മച്ച്ഛറിന് വിമാനത്തിലെ ജീവനക്കാരിലൊരാൾ ഗുളിക നൽകാൻ ശ്രമിച്ചെന്ന യാത്രക്കാരന്റെ മൊഴി പുറത്തുവന്നിട്ടുണ്ട്. ആക്രമണത്തിന് പിന്നാലെ യാത്രക്കാർ കീഴടക്കിയ ഒമാൻ സ്വദേശിയായ സഹപൈലറ്റ് ഹമ്മാം അൽ ഹമ്മാമിയെ മോചിപ്പിക്കാൻ മറ്റൊരു ജീവനക്കാരൻ ശ്രമിച്ചെന്ന വിവരങ്ങളും പുറത്തുവരുന്നുണ്ട്. സംഭവത്തിൽ കൂടുതൽ വിമാന ജീവനക്കാർക്ക് പങ്കുണ്ടോയെന്ന കാര്യത്തിൽ അന്വേഷണം പുരോഗമിക്കുകയാണ്.
ആക്രമണത്തിനിടെ ഗുരുതരമായി പരിക്കേറ്റ മച്ച്ഛറിന് എന്ത് ഗുളികയാണ് നൽകാൻ ശ്രമിച്ചതെന്ന കാര്യത്തിൽ വ്യക്തതയില്ല. മരുന്നിന്റെ പേര്, അത് നൽകാനുണ്ടായ സാഹചര്യം, ജീവനക്കാരന്റെ ഉദ്ദേശ്യം എന്നിവ സംബന്ധിച്ച വിവരങ്ങളും പുറത്തുവന്നിട്ടില്ല.
ഗുളിക നൽകാൻ ശ്രമിച്ചതെന്തിന്?
വിമാനങ്ങളിൽ അടിയന്തര ചികിത്സയ്‌ക്കായി മെഡിക്കൽ കിറ്റുകളും മരുന്നുകളും സൂക്ഷിക്കുന്നത് സാധാരണമാണ്. എന്നാൽ, ആക്രമണത്തിൽ ഗുരുതരമായി പരിക്കേറ്റ പൈലറ്റിന് ഏത് മരുന്നാണ് നൽകാൻ ശ്രമിച്ചതെന്ന് കണ്ടെത്തേണ്ടതുണ്ട്.
മാലദ്വീപ് സ്വദേശികളായ പൈലറ്റുമാർ കസ്റ്റഡിയിൽ
സംഭവവുമായി ബന്ധപ്പെട്ട് ഫ്ലൈദുബായിലെ രണ്ട് മാലദ്വീപ് പൈലറ്റുമാരെ യുഎഇ അധികൃതർ കസ്റ്റഡിയിലെടുത്തതായും റിപ്പോർട്ടുകളുണ്ട്. ഒക്ടോബർ മൂന്നിനാണ് ഇവരെ കസ്റ്റഡിയിലെടുത്തത്. മാലദ്വീപ് മാധ്യമങ്ങളാണ് ഇക്കാര്യം റിപ്പോർട്ട് ചെയ്തത്. ആക്രമണം നടത്തിയ അൽ ഹമ്മാമിയുമായി ഇവരുടെ ബന്ധം വ്യക്തമല്ല.
