തിരുവനന്തപുരം: സിഎംആർഎൽ–എക്സാലോജിക് കേസിൽ മുഖ്യമന്ത്രി പിണറായി വിജയനും മറ്റുള്ളവർക്കും എൻഫോഴ്സ്മെന്റ് ഡയറക്ടറേറ്റ് (ഇഡി) നോട്ടീസ് അയച്ചത് പൂർണമായും അന്വേഷണ ഏജൻസിയുടെ തീരുമാനപ്രകാരമാണെന്ന് രമേശ് ചെന്നിത്തല. നിയമം നിയമത്തിന്റെ വഴിക്ക് പോകട്ടെയെന്നും വിഷയത്തിൽ കോൺഗ്രസിനുള്ളിൽ അഭിപ്രായവ്യത്യാസമില്ലെന്നും അദ്ദേഹം പറഞ്ഞു.
കേസിൽ ഇഡി സ്വീകരിച്ച നടപടിയെക്കുറിച്ച് പ്രതികരിക്കുകയായിരുന്നു ചെന്നിത്തല. വിഷയത്തിൽ എല്ലാവരും ഒറ്റക്കെട്ടാണെന്നും എല്ലാവരുമായും ആലോചിച്ചാണ് തീരുമാനങ്ങൾ എടുക്കുന്നതെന്നും അദ്ദേഹം വ്യക്തമാക്കി.
‘കടന്നുവന്ന വഴി പിണറായി ഓർക്കണം’
അതേസമയം, മുഖ്യമന്ത്രി പിണറായി വിജയനെതിരെ വിമർശനവുമായി കോൺഗ്രസ് എംഎൽഎ മാത്യു കുഴൽനാടനും രംഗത്തെത്തി. കടന്നുവന്ന വഴി പിണറായി ഓർക്കണമെന്നായിരുന്നു അദ്ദേഹത്തിന്റെ പ്രതികരണം.
ഉമ്മൻചാണ്ടിയെ ബലാത്സംഗക്കേസിൽ പെടുത്തിയ ആളാണ് പിണറായി വിജയനെന്ന് മാത്യു കുഴൽനാടൻ ആരോപിച്ചു. അക്കാര്യം കോൺഗ്രസ് പ്രവർത്തകർ മറക്കണോയെന്നും അദ്ദേഹം ചോദിച്ചു. അന്നത്തെ ഉമ്മൻചാണ്ടിയുടെ മുഖം ഇപ്പോഴും മനസ്സിലുണ്ടെന്നും മാത്യു കുഴൽനാടൻ പറഞ്ഞു.
വിഷയത്തിൽ തനിക്ക് പറയാനുള്ളതെല്ലാം പാർട്ടിക്കുള്ളിൽ പറഞ്ഞിട്ടുണ്ടെന്നും അദ്ദേഹം വ്യക്തമാക്കി.