ഡെറാഡൂണ്‍: നേപ്പാള്‍ അതിര്‍ത്തിയിലെ സുരക്ഷ ശക്തമാക്കി ഇന്ത്യ. നിലവിലെ അതിര്‍ത്തി രക്ഷാ സേനകള്‍ക്ക് പുറമേ സീമാ സശസ്ത്ര ബലിനെ ഇറക്കി സുശക്തമാക്കുകയാണ്. പിത്തോട്ഗടിലെ ധ്രാചൂല മേഖല മുതല്‍ തര്‍ക്കം നിലനില്‍ക്കുന്ന കാലാപാനി വരെയുള്ള അതിര്‍ത്തിയാണ് സൈന്യത്തിന്റെ നിയന്ത്രണത്തിലേക്ക് വന്നിരിക്കുന്നത്.
നേപ്പാള്‍ അനധികൃതമായി ഭൂപടത്തില്‍ ചേര്‍ത്ത കാലാപാനി, ലിംപിയാഥുര അടക്കമുള്ള ഉത്തരാഖണ്ഡിലെ പ്രദേശങ്ങളിലെ അതിര്‍ത്തി ഇനി ശക്തമായ സൈനിക മേല്‍നോട്ടത്തിലായിരിക്കും. നിലവിലെ സാധാരണ പട്രോളിംഗ് സംവിധാനത്തിന് പകരമായി പാക് അതിര്‍ത്തിയുടെ രീതിയിലുള്ള പട്രോളിംഗ് സംവിധാനം നടപ്പാക്കുകയാണെന്നും എസ്.എസ്.ബി ചുമതലയുള്ള സന്തോഷ് നേഗി അറിയിച്ചു.
ഭൂപടവിഷയത്തിന് പുറമേ നേപ്പാളില്‍ ചൈനയുടെ കൈകടത്തല്‍ കൂടിയതോടെ അതിര്‍ത്തി പ്രദേശം അതീവ സുരക്ഷാ മാനദണ്ഡത്തില്‍ പെടുത്തിയിരിക്കുകയാണ്. സൈന്യത്തെ പരമാവധി ഒഴിവാക്കി നിര്‍ത്തിയ മേഖലകളില്‍ ഇനി അര്‍ദ്ധസൈനിക വിഭാഗങ്ങളെ വിന്യസിക്കാനാണ് പ്രതിരോധ വകുപ്പിന്റെ നിര്‍ദ്ദേശം. അതിര്‍ത്തിയില്‍ അധികം ജനവാസമില്ലാത്ത മേഖലയടക്കം ഇനി സീമാ സശസ്ത്ര ബലിന്റെ സൈനികരുടെ നിതാന്ത ശ്രദ്ധയിലായിരിക്കുമെന്നും സന്തോഷ് നേഗി പറഞ്ഞു.
