ശ്രീ കോവിലില് ഇരിക്കുന്ന ദേവിയെ ഭയഭക്തി ബഹുമാനത്തോടെ അകലെ നിന്ന് തൊഴുന്ന ഭക്തരെ ആണ് നമ്മള് കണ്ടിട്ടുള്ളത്. എന്നാല് കൂപ്പുകൈയോടെ ദേവിയ്ക്ക് അടുത്തു തന്നെ നിലകൊള്ളുന്ന ഭക്തന്റെ കഥയാണ് കണ്ടത്താര് കാവിന് പറയാനുള്ളത്.
പാലക്കാട് ജില്ലയില് , ആലത്തൂര് താലൂക്കില് , കോട്ടായി ഗ്രാമപഞ്ചായത്തിലാണ് അപൂര്വമായ ഒരു ഐതിഹ്യവുമായി ഈ ക്ഷേത്രം നിലകൊള്ളുന്നത്. അന്യ ദേശങ്ങളില് നിന്നുപോലും ദര്ശനത്തിനും വഴിപാടിനുമായി നിരവധി ആളുകള് എത്തുന്ന ഈ ക്ഷേത്രത്തില് പൂജ നടത്തുന്നത് നായര് സമുദായത്തില് പെട്ടവരാണ്. ഒളപ്പമണ്ണമന ദേവസ്വത്തിന്റെ മേല്നോട്ടത്തില് ആണ് ഇവിടുത്തെ പ്രതിഷ്ഠയും ഭരണകാര്യങ്ങളും നടത്തി പോന്നിരുന്നത്.
ക്ഷേത്രത്തെ പറ്റി നിരവധി കഥകള് ഉണ്ടെങ്കിലും ഏറ്റവും പ്രചാരത്തില് ഉള്ളത് താഴെ പറയുന്നതാണ്.കല്ലടികോട് നീലി എന്ന മന്ത്രവാദിനിയുടെ കീഴില് നാല് ആളുകള് മന്ത്രവിദ്യ അഭ്യസിച്ചു വന്നിരുന്നു. അതില് കണ്ടത്ത് രാമന് നായര് മന്ത്രവിദ്യയില് നിപുണന് ആവുകയും അദ്ദേഹത്തിന് ദേവി കടാക്ഷം ഉണ്ടായിത്തീരുകയും ചെയ്തു. അക്കാലത്ത് നാട്ടിലെ പ്രമാണിമാരുടെ ഉപദ്രവം സഹിക്കവയ്യാതെ ആളുകള് കണ്ടത്ത് രാമന് നായരെ സമീപിക്കുകയും ഇതില് നിന്നും ഒരു മുക്തി നേടി തരണമെന്ന് അപേക്ഷിക്കുകയും ചെയ്തു. പ്രമാണിമാര്ക്കെതിരെ ശബ്ദമുയര്ത്തിയ കണ്ടത്ത് രാമന് നായരെ പ്രമാണിമാര് കഴുത്തുവെട്ടി കൊലപ്പെടുത്തി.
ദേവിയുടെ പ്രിയ ഭക്തനായിരുന്ന കണ്ടത്ത് രാമന് നായരുടെ വെട്ടിമാറ്റപ്പെട്ട തലഭാഗം കണക്കുളങ്ങര എന്ന പ്രദേശത്തും ഉടല്ഭാഗം കുളങ്ങരത്തൊടിയിലും വീണുകിടന്നുവത്രെ. പിന്നീടൊരിക്കല് വനപ്രദേശമായിരുന്ന സ്ഥലത്തുകൂടി വിറകു ശേഖരിക്കാന് എത്തിയ ഒരു സ്ത്രീ ഒരു തേജസ്സു കാണുകയും , വിവരം ഒളപ്പമണ്ണ മനയില് അറിയിക്കുകയും ചെയ്തു. പ്രശ്നം വെച്ചു നോക്കിയപ്പോള് ദേവീസാന്നിധ്യം ഉള്ള സ്ഥലം ആണെന്നും അവിടെ ഒരു ക്ഷേത്രം പണിയണമെന്നും ദേവിയുടെ പ്രിയ ഭക്തനായ കണ്ടത്ത് രാമന് നായരെ ദേവിയോടൊപ്പം പ്രതിഷ്ഠിക്കണമെന്നും കണ്ടെത്തുകയായിരുന്നു.
കണ്ടത്ത് രാമന് നായര് എന്ന പേര് പിന്നീട് ലോപിച്ച്’ കണ്ടത്താര് ‘എന്നായി. കണ്ടത്താര് , ദേവിയോടൊപ്പം കുടികൊള്ളുന്ന ക്ഷേത്രം കണ്ടത്താര് കാവായി അറിയപ്പെടുകയും ചെയ്തു. ദേവി വിഗ്രഹത്തിന്നരികില് കൂപ്പുകയ്യുമായി കണ്ടത്താര് ഇന്നും നില കൊള്ളുന്നു.
