ലണ്ടന്‍:ഇംഗ്ലീഷ് പ്രീമിയര്‍ ലീഗില്‍ മാഞ്ചെസ്റ്റര്‍ സിറ്റിക്ക് അപ്രതീക്ഷിത തോല്‍വി. സതാംടണാണ് ഏക ഗോളിന് ഗ്വാര്‍ഡിയോളയുടെ ടീമിനെ തോല്‍പ്പിച്ചത്. കഴിഞ്ഞ ദിവസം ലീഗ് ചാമ്പ്യന്മാരായ ലിവര്‍പൂളിനെ ഗോള്‍ മഴയില്‍ മുക്കിയ സിറ്റിക്ക് തോല്‍വി വലിയ അടിയായി. ചെ ആദംസാണ് സതാംപടണ് വേണ്ടി ഗോള്‍ നേടിയത്. കളിയുടെ തുടക്കത്തില്‍ തന്നെ 16-ാം മിനിറ്റിലാണ് സിറ്റിയുടെ വല ആദംസ് ചലിപ്പിച്ചത്. ലീഗില്‍ 13-ാം സ്ഥാനത്തുമാത്രമാണ് സതാംടണിന്റെ നിലവിലെ സ്ഥാനം. താരതമ്യേന ദുര്‍ബലരായ സതാംടണിന് മുന്നിലാണ് സിറ്റി തീര്‍ത്തും നിറംമങ്ങിപ്പോയത്. സീസണിലെ 9 മ്തസരങ്ങളില്‍ എങ്ങനെയാണ് തോറ്റതെന്ന് മനസ്സിലാകുന്നില്ലെന്നാണ് കോച്ച് പെപ് ഗ്വാര്‍ഡിയോള പറഞ്ഞത്.
രണ്ടാം മത്സരത്തില്‍ സിറ്റിയോട് ഏറ്റ ക്ഷീണം ലീഗ് ചാമ്പ്യന്മാര്‍ തീര്‍ത്തു. ആസ്റ്റണ്‍ വില്ലക്കെതിരെ എതിരില്ലാത്ത രണ്ടു ഗോളുകള്‍ക്കാണ് ലിവര്‍പൂള്‍ ജയിച്ചത്. സാദിയോ മാനേയുടെ വക 71-ാം മിനിറ്റിലും കര്‍ട്ടിസ് ജോനെസിന്റെ വകയായി 89-ാം മിനിറ്റിലുമാണ് ഗോളുകള്‍ വീണത്. ജയത്തോടെ 33 മത്സരങ്ങളിലായി 29 ജയങ്ങളോടെ ലിവര്‍പൂളിന്റെ പോയിന്റ് നില 89 ആയി.
മൂന്നാം മത്സരത്തില്‍ ചെല്‍സി വാട്ട്‌ഫോഡിനെതിരെ എതിരില്ലാത്ത മൂന്നുഗോളുകളുടെ ജയമാണ് നേടിയത്. കളിയുടെ രണ്ടു പകുതികളിലും നീലപ്പട ഗോളുകള്‍ നേടി. കളിയുടെ 28-ാം മിനിറ്റില്‍ ഒലിവര്‍ ജിരോദാണ് ആദ്യ ഗോള്‍ നേടിയത്. 43-ാം മിനിറ്റിറ്റില്‍ കിട്ടിയ പെനാല്‍റ്റി വില്ലിയന്‍ ഗോളാക്കിയപ്പോള്‍ റോസ് ബാര്‍ക്കിലി 92-ാം മിനിറ്റില്‍ മൂന്നാം ഗോളും നേടി പട്ടിക പൂര്‍ത്തിയാക്കി. പോയിന്റു നിലയില്‍ സിറ്റിയ്‌ക്കും ലെസ്റ്ററിനും പുറകില്‍ ലീഗില്‍ നാലാം സ്ഥാനത്താണ് ചെല്‍സി.
