ഇന്ത്യൻ ചലച്ചിത്ര രംഗത്ത് ആദ്യമായി വനിത സൂപ്പർസ്റ്റാർ എന്ന പദവയിലേക്കുയർന്നത് ശ്രീദേവി എന്ന അതുല്യ പ്രതിഭ ആയിരുന്നു . തമിഴ് , ഹിന്ദി , മലയാളം , കന്നഡ തുടങ്ങിയ ഭാഷകളിൽ തന്റെ വ്യക്തിമുദ്ര പതിപ്പിച്ച അസാധാരണ കഴിവുകൾക്ക് ഉടമ കൂടിയായിരുന്നു ശ്രീദേവി .ശ്രീദേവിയുടെ അഞ്ചു പതിറ്റാണ്ടോളം നീണ്ടു നിന്ന സിനിമ ജീവിതത്തിൽ ദേശീയ പുരസ്കാരം ഉൾപ്പെടെ നിരവധി പുരസ്കാരങ്ങൾ അവരെ തേടി എത്തിയിരുന്നു . ചലിച്ചത്ര മേഖലയിൽ അവർ നൽകിയ സംഭാവനകളെ മാനിച്ചു കൊണ്ട് 2013 ൽ രാജ്യം പദ്മശ്രീ പുരസ്കാരം നൽകി ആദരിക്കുകയുണ്ടായി .
എൺപതു തൊണ്ണൂറ് കാലഘട്ടങ്ങളിൽ തന്റെ അഭിനയ പാടവം കൊണ്ട് താര മൂല്യം ഉയർത്തിയ നടി കൂടി ആയിരുന്നു ശ്രീദേവി . കോമഡി കഥാപാത്രങ്ങൾ മുതൽ ഇതിഹാസ കഥാപാത്രങ്ങൾ വരെ അനായാസം അവതരിപ്പിച്ചിരുന്നു അവർ .
നാലാമത്തെ വയസ്സിൽ ബാലതാരമായി ചലച്ചിത്ര ലോകത്തെത്തിയ ശ്രീദേവി കുറെ ചിത്രങ്ങൾ ആ കാലഘട്ടത്തിൽ ചെയ്തു . മുതിർന്ന കഥാപാത്രമായി ശ്രീദേവി രംഗത്തെത്തിയത് അവരുടെ പതിമൂന്നാമത്തെ വയസ്സിലായിരുന്നു . തുടർന്നങ്ങോട്ട് സിനിമയിൽ ജൈത്രയാത്ര ആരംഭിച്ച ശ്രീദേവി തെന്നിന്ത്യൻ ചലച്ചിത്ര ലോകം അടക്കി വാണു . സോൾവ സാവൻ എന്ന ചിത്രത്തിലൂടെ 1979 ലാണ് ശ്രീദേവി ഹിന്ദി ചലച്ചിത്രലോകത്തേക്ക് പ്രവേശിച്ചത് .
മുന്നൂറോളം ചിത്രങ്ങളിൽ അഭിനയിച്ച ശ്രീദേവിയുടെ ഏറ്റവും ശ്രദ്ധിക്കപ്പെട്ട ചലച്ചിത്രങ്ങൾ ചാന്ദ്നി , നഗീന , മിസ്റ്റർ ഇന്ത്യ , ചാൽ ബാസ് , സദ്മ , ഖുദാ ഗവ എന്നിവയാണ് . കുറച്ചുകാലം ചലച്ചിത്ര രംഗത്ത് നിന്ന് മാറി നിന്ന ശ്രീദേവി 2012 ൽ ഇറങ്ങിയ ഇംഗ്ലീഷ് വിന്ഗ്ലീഷ് എന്ന ചിത്രത്തിലൂടെ ശക്തമായ തിരിച്ചു വരവാണ് നടത്തിയത് . ഏറ്റവും മികച്ച നടിക്കുള്ള ദേശീയ പുരസ്കാരം നേടി കൊടുത്ത 2017 ൽ ഇറങ്ങിയ മോമ് എന്ന ചിത്രമാണ് ശ്രീദേവി അവസാനമായി അഭിനയിച്ചത് .
2018 ൽ ദുബായിലെ ഹോട്ടലിൽ വെച്ച് ശ്രീദേവി മരണമടഞ്ഞു എന്ന വാർത്ത ലോകമെമ്പാടുമുള്ള ചലച്ചിത്ര രംഗം ഞെട്ടലോടെയാണ് സ്വീകരിച്ചത് .
