ശരീര ഭാരം കുറക്കാൻ ജീരകവും, മല്ലിയും …

ശരീര ഭാരം കുറക്കാൻ വേണ്ടി കൃത്രിമമായ രീതികൾക്ക് പിന്നാലെ പോകുന്നതിനേക്കാൾ നല്ലത് പ്രകൃതി നമുക്ക് നൽകിയ വസ്തുക്കൾ ഉപയോഗിക്കുന്നതാണ് . പോഷകസമൃദ്ധവും ഗുണപ്രദവുമായ ഒരുപാട് വസ്തുക്കൾ പ്രകൃതി നമ്മുക്ക് കനിഞ്ഞു തന്നിട്ടുണ്ട് അവയിൽ പെടുന്നതാണ് ജീരകവും മല്ലിയും . ശരീര ഭാരം കുറക്കാൻ വളരെയധികം പ്രയോജനമുള്ള വസ്തുക്കളാണ് ഇവ രണ്ടും .

ശരീര ഭാരം കുറക്കാനും ആരോഗ്യത്തിനും ജീരകത്തിന്റെ ഗുണങ്ങൾ

നമ്മുടെ വീടുകളിൽ സ്ഥിരമായി ഉപയോഗിക്കുന്ന സുഗന്ധവും രുചിയും നൽകുന്ന ഒന്നാണ് ജീരകം . ഇതിനേക്കാളുപരി ആരോഗ്യകരമായ ഒരുപാട് ഗുണങ്ങൾ ഉള്ള വസ്തു കൂടിയാണ് ജീരകം . ശരീര ഭാരം കുറക്കാനും , രോഗപ്രതിരോധശേഷി വർദ്ധിപ്പിക്കാനും , രക്തത്തിലെ പഞ്ചസാരയുടെ അളവ് കുറക്കാനും ജീരകത്തിന് സാധിക്കും .

ജീരകത്തിൽ കലോറി കുറവായതിനാൽ ദിനവും ഭക്ഷണത്തിൽ ഉൾപ്പെടുത്തുന്നത് കൊണ്ട് കൂടുതലായി കലോറി ശരീരത്തിൽ എത്തും എന്ന ഭയം വേണ്ട . ജീരകം നമ്മുടെ ശരീരത്തിലെ പാൻക്രിയാസ് ഉല്പാദിപ്പിക്കുന്ന എൻസൈമുകളുടെ അളവ് വർദ്ധിപ്പിക്കുകയും തന്മൂലം ദഹനപ്രക്രിയ സുഖമായി നടക്കാൻ സഹായിക്കുകയും ചെയ്യുന്നു . ജീരകത്തിൽ അടങ്ങിയിരിക്കുന്ന തൈമോൾ , ഉമിനീർ ഗ്രന്ഥിയുടെ പ്രവർത്തനത്തെ ഉത്തേജിപ്പിക്കുകയും , അതുമൂലം നമ്മൾ കഴിക്കുന്ന ഭക്ഷണത്തിൽ അടങ്ങിയിരിക്കുന്ന പഞ്ചസാര , പ്രോടീൻ , കൊഴുപ്പ് എന്നിവയെ വിഭജിക്കാൻ സഹായിക്കുകയും ചെയ്യുന്നു . ജീരകത്തിൽ ധാരാളം ധാതുക്കളും വിറ്റാമിനുകളും അടങ്ങിയിരിക്കുന്നു കൂടാതെ ശരീരത്തിൽ അടിഞ്ഞു കൂടുന്ന വിഷാംശങ്ങളെ പുറംതള്ളാനുള്ള കഴിവും ജീരകത്തിന് ഉണ്ട് . ദിനവും വെറും വയറ്റിൽ ഒരു ഗ്ലാസ് ജീരക വെള്ളം കുടിക്കുന്നത് ഉത്തമമാണ് .

ശരീരഭാരം കുറക്കുന്നതിനും ആരോഗ്യത്തിനും മല്ലിക്കുള്ള ഗുണങ്ങൾ 

പണ്ട് കാലം മുതലേ ആരോഗ്യത്തിന് ഒരുപാട് ഗുണങ്ങൾ ഉള്ള മല്ലി നമ്മുടെ ഭക്ഷണത്തിൽ ഉൾപ്പെടുത്തുന്ന പ്രധാനപ്പെട്ട ഒരു വസ്തുവാണ് . ആരോഗ്യപരമായി ശരീര ഭാരം കുറക്കാനും മല്ലി വളരെ നല്ലൊരു സഹായി ആണ് .

ശരീരത്തിൽ അടിഞ്ഞു കൂടുന്ന വിഷാംശത്തെ പുറംതള്ളാനുള്ള കഴിവ് മല്ലിക്കുണ്ട് . കൂടാതെ ശരീരത്തിന്റെ പ്രവർത്തനങ്ങൾ സുഗമമായി നടക്കുവാനും മല്ലി സഹായിക്കുന്നു . ദഹനപ്രക്രിയയെ ഉത്തേജിപ്പിക്കാനുള്ള കഴിവ് മല്ലിക്കുണ്ട് , അതിനാൽ തന്നെ ശരീരത്തിനെ ആവശ്യമായ പോഷകങ്ങൾ വലിച്ചെടുക്കാൻ മല്ലി സഹായിക്കുന്നു . രക്തത്തിൽ പഞ്ചസാരയുടെ അളവ് നിയന്ത്രിക്കാനും , ശരീരത്തിൽ ഉണ്ടാകുന്ന വീക്കം തടയാനും , ശരീരത്തിലെ അധിക ജലാംശം ഇല്ലാതാക്കാനും സഹായിക്കുന്നു .

മല്ലി ഇട്ട് തിളപ്പിച്ച വെള്ളമോ ചായയോ ദിനവും കഴിക്കുന്നത് ആരോഗ്യപരമായ രീതിയിൽ ശരീര ഭാരം കുറക്കാൻ സഹായിക്കും .

ആരോഗ്യകരവും പോഷകസമൃദ്ധവുമായ ഭക്ഷണശീലത്തോടൊപ്പം വ്യാമയാവും കൂടാതെ നിങ്ങളുടെ അഭിരുചിക്കനുസരിച്ചു ശരീര ഭാരം കുറയ്‌ക്കാനായി ജീരകമോ മല്ലിയോ തിരഞ്ഞെടുക്കാവുന്നതാണ് .