ബാബ ബാലക് നാഥ ക്ഷേത്രം

ക്ഷേത്രങ്ങളുടെ എണ്ണത്തിലും ഓരോ പ്രത്യേകതകളുടെയും പേരിൽ പ്രശസ്തമാണ് ഭാരതം. ക്ഷേത്രങ്ങളുടെ ചരിത്രവും പ്രതിഷ്ഠകളും ആചാരങ്ങളും കൊണ്ട് പ്രസിദ്ധമാണ് ഓരോ ക്ഷേത്രവും. ഇത്തവണ അത്തരത്തിൽ വ്യത്യസ്തത നിറഞ്ഞ ഒരു ക്ഷേത്രത്തിലേക്കാവാം യാത്ര.

ഹിമാചൽപ്രദേശിൽ ധർമ്മശാലയിൽ ഹമീർപൂർ ജില്ലയിലെ ദിയോദ്സിദ് പ്രദേശത്തെ ഗുഹയ്‌ക്കുള്ളിൽ സ്ഥിതി ചെയ്യുന്ന ബാബ ബാലക് നാഥ ക്ഷേത്രത്തിന്റെ വിശേഷങ്ങളിലേക്ക്. ക്ഷേത്രപരിസരങ്ങളിൽ എത്താമെങ്കിലും സ്ത്രീകൾക്ക് ക്ഷേത്രത്തിന്റെ ഉള്ളിലേക്ക് പ്രവേശനം ഇല്ല. എന്നിരുന്നാലും ക്ഷേത്രത്തിന്റെ പുറമെ നിന്ന് പ്രാർത്ഥിക്കാൻ നിരവധി സ്ത്രീകൾ ഇവിടെ വന്നെത്താറുണ്ട്.

ഹിമാചൽ പ്രദേശിലെ ഈ ക്ഷേത്രത്തിൽ ആരാധിക്കുന്നത് ബാബ ബാലക് നാഥിനെയാണ്. കലിയുഗത്തിൽ കാർത്തികേയ ഭഗവാന്റെ അവതാരമായാണ് ബാബ ബാലക് നാഥിനെ കണക്കാക്കുന്നത്.

ഈ ക്ഷേത്രവുമായി ബന്ധപ്പെട്ടുള്ള വിശ്വാസം എന്തെന്നാൽ സന്താനഭാഗ്യമില്ലാത്ത ദമ്പതികൾ ഇവിടെ എത്തി പ്രാർത്ഥിച്ചാൽ ശിവ ഭഗവാൻ അവരെ അനുഗ്രഹിക്കുമെന്നും അവർക്ക് സന്താന ഭാഗ്യം ഉണ്ടാകുമെന്നുമാണ്.

ക്ഷേത്രവുമായി ബന്ധപ്പെട്ടുള്ള മറ്റൊരു രസകരമായ സംഭവം ആടുകളെ നേർച്ച നൽകുന്നതാണ്. ഇതിൽ എന്താണ് അത്ഭുതപ്പെടാൻ ഉള്ളതെന്നല്ലേ, പറയാം. 2019ൽ മാത്രം ഇവിടെ ലഭിച്ചത് 6371 ആടുകളെ ആണ്. ഈ ആടുകളെ ലേലം ചെയ്യുക വഴി ക്ഷേത്രത്തിന് ലഭിച്ചത് ഒന്നരകോടിയോളം രൂപയാണ്. 2018ൽ ലഭിച്ച 5825 ആടുകളെ ലേലം ചെയ്തതിലൂടെ ലഭിച്ചത് 1.19 കോടി രൂപയായിരുന്നു. ക്ഷേത്രത്തിൽ നേർച്ചയായി ലഭിക്കുന്ന ആടുകളെ ബലി നൽകുന്ന ചടങ്ങ് ഇല്ല എന്ന് എടുത്തുപറയേണ്ടതാണ്. തിങ്കൾ, വെള്ളി ദിവസങ്ങളിലാണ് ആടുകളെ നേർച്ച നൽകുന്ന ചടങ്ങ് ക്ഷേത്രത്തിൽ നടക്കുന്നത്.

മാർച്ച് – ഏപ്രിൽ മാസങ്ങളിൽ ആണ് ക്ഷേത്രത്തിൽ തിരക്ക് അനുഭവപ്പെടാറുള്ളത്. ഭാരതത്തിന്റെ വിവിധയിടങ്ങളിലെ വിശ്വാസികൾ ഏറെ ഇഷ്ടപ്പെടുന്ന സ്ഥലം കൂടിയാണിത്.