ന്യൂഡല്‍ഹി: മുഴുവന്‍ വിദ്യാലയങ്ങളിലും മാതൃഭാഷ അടിസ്ഥാനമാക്കിയുള്ള വിദ്യാഭ്യാസം നിര്‍ബന്ധമാക്കുമെന്ന് പ്രധാനമന്ത്രി നരേന്ദ്രമോദി. വിദ്യാര്‍ത്ഥികളെല്ലാം പുസ്തകപ്പുഴു ക്കളാവുകയാണ്. മാത്രമല്ല അവരുടെ ഭാവന വികസിക്കുന്ന തരത്തില്‍ സ്വന്തം ഭാഷയില്‍ കാര്യങ്ങള്‍ ഗ്രഹിക്കാനാകുന്നില്ല. ഇതിന് പരിഹാരം മാതൃഭാഷാ പഠനം മാത്രമാണെന്നും പ്രധാനമന്ത്രി പറഞ്ഞു. ദേശീയ വിദ്യാഭ്യാസ നയവുമായി ബന്ധപ്പെട്ട കോണ്‍ക്ലേവില്‍ സംസാരിക്കുകയായിരുന്നു പ്രധാനമന്ത്രി.
കേന്ദ്ര വിദ്യാഭ്യാസ മന്ത്രാലയം സംഘടിപ്പിച്ച ശിക്ഷാ പര്‍വ്വ് എന്ന പരിപാടിയിലൂടെയാണ് പ്രധാനമന്ത്രി ദേശീയ വിദ്യാഭ്യാസ നയത്തിന്റെ പ്രാധാന്യം വിശദീകരിച്ചത്. പ്രാദേശിക ഭാഷയുടെ വികാസവും പഠനവും ഇന്ത്യയിലെ പൗരന്മാരുടെ ക്ഷമതകൂട്ടുമെന്നും അദ്ദേഹം വ്യക്തമാക്കി. അതേസമയം ഇംഗ്ലീഷ് ഉള്‍പ്പടെയുള്ള ഭാഷകള്‍ പഠിപ്പിക്കുന്നതില്‍ യാതൊരു നിയന്ത്രണവും ഏര്‍പ്പെടുത്തുന്നില്ലെന്നും ആഗോള ഭാഷകളും വിദ്യാര്‍ത്ഥികള്‍ പഠിക്കണമെന്നും പ്രധാനമന്ത്രി പറഞ്ഞു. ഇന്ത്യന്‍ സ്വാതന്ത്ര്യത്തിന്റെ 75-ാം വാര്‍ഷികം ആഘോഷിക്കുന്ന 2022ഓടെ ദേശീയ വിദ്യാഭ്യാസ നയത്തിന്റെ മാറ്റങ്ങള്‍ നടപ്പിലാകുമെന്നും പ്രധാനമന്ത്രി പറഞ്ഞു.
