സ്ത്രീ സുമംഗലിയായതിന്റെ അടയാളമായിട്ടാണ് താലിയെയും സിന്ദൂരത്തെയും കാണുന്നത്. എന്നാല്‍ പുതു തലമുറയിലെ മിക്ക പെണ്‍കുട്ടികളും ഇതൊന്നും ധരിക്കാറില്ല. കാലം പുരോഗമിച്ചു എന്നും താലി അണിയുന്നത് പഴഞ്ചന്‍ സമ്പ്രദായം ആണെന്നുമാണ് അവരുടെ വാദം. അതുകൊണ്ട് തന്നെ ഇതിനെ എതിര്‍ക്കുന്നവരാണ് മിക്ക പെണ്‍കുട്ടികളും. എന്നാല്‍ പ്രായമായവര്‍ അല്ലെങ്കില്‍ പഴയ തലമുറയില്‍ ഉള്ളവര്‍ക്ക് ഇതൊന്നും അംഗീകരിച്ചു കൊടുക്കാന്‍ സാധില്ല. താലിയെ സ്വന്തം ജീവനായി കാണുന്നവരാണ് മിക്ക സ്ത്രീകളും. ഭാര്യയെ ജീവാത്മാവും ഭര്‍ത്താവിനെ പരമാത്മാവുമായാണ് കണക്കാക്കുന്നത്.
ജീവാത്മാവിനെയും പരമാത്മാവിനെയും ബന്ധിപ്പിക്കുന്ന ഒന്നായിട്ടാണ് താലിയെ സങ്കല്‍പ്പിക്കുന്നത്. അതുകൊണ്ടു തന്നെ താലി അഴിച്ചു വയ്‌ക്കുമ്പോള്‍ നമ്മളില്‍ ജീവാത്മാവില്‍ നിന്നും പരമാത്മാവ് വേര്‍പെട്ടു പോകുന്നു എന്നും ഭര്‍ത്താവ് നമ്മളില്‍ നിന്നും അകലുന്നു അല്ലെങ്കില്‍ ഭര്‍ത്താവ് നമ്മെ വിട്ടുപിരിയുന്നു എന്നുമുളള വിശ്വാസങ്ങള്‍ നിലനില്‍ക്കുന്നു. ഈ വിശ്വാസമാണ് താലി അഴിച്ചു വയ്‌ക്കുന്നത് ഭര്‍ത്താവിനു ദോഷമാണ് എന്നു പറയുന്നതിന്റെ കാരണം.
വിവാഹത്തിന്റെ പ്രത്യക്ഷമായ ഒരു സാക്ഷ്യപത്രമാണ് താലി. ഹൈന്ദവരുടെ ഇടയില്‍ താലിയ്‌ക്ക് വലിയ പ്രാധാന്യമാണുള്ളത്. ഭാരതത്തിലെ സ്ത്രീകളുടെ സംസ്‌കാരത്തിന്റേയും ജീവന്റേയും അഭിമാനത്തിന്റേയും ഭാഗമാണ് താലി. താലി ധരിക്കുന്നത് ഒരു സ്ത്രീക്ക് തന്റെ ഭര്‍ത്താവ് തന്നോടൊപ്പമുള്ള ശക്തി നല്‍കുന്നു. താലി അഴിച്ചു മാറ്റുമ്പോള്‍ ആ ബലം സ്ത്രീക്ക് നഷ്ടപ്പെടുന്നു. മാറ്റങ്ങളുടെ ലോകത്ത് ഇവയെല്ലാം പഴഞ്ചന്‍ സമ്പ്രദായമായാണ് പുതിയ തലമുറ കരുതുന്നത്. എന്നാല്‍ ഇതൊരിക്കലും ഒരു പഴയ സമ്പ്രദായമല്ല. പുരുഷനേയും സ്ത്രീയേയും തമ്മില്‍ ബന്ധിപ്പിക്കുന്ന ഒരു പ്രധാന ഘടകം കൂടിയാണ്.
Comments