ന്യൂഡല്‍ഹി: പുതുക്കിയ ദേശീയ വിദ്യാഭ്യാസ നയവുമായി ബന്ധപ്പെട്ട പരിശീലനം ദേശീയ തലത്തില്‍ അദ്ധ്യാപകര്‍ക്ക് നല്‍കുമെന്ന് കേന്ദ്രവിദ്യാഭ്യാസ വകുപ്പറിയിച്ചു. ഈ വര്‍ഷം കരിക്കുലം തലത്തിലെ പരിശീലനം നല്‍കുമെന്ന് കേന്ദ്ര വിദ്യാഭ്യാസ മന്ത്രി രമേശ് പൊഖ്‌റിയാലാണ് വ്യക്തമാക്കിയത്.
നാഷണല്‍ കരിക്കുലം ഫോര്‍ ടീച്ചേഴ്‌സ് എഡ്യൂക്കേഷന്‍ എന്ന സംവിധാനത്തിലൂടെ പുതുക്കിയ വിദ്യാഭ്യാസ നയം അദ്ധ്യാപകരെ പരിശീലിപ്പിക്കും. ദേശീയ അദ്ധ്യാപക പരിശീലന പരിപാടിയുടെ ഭാഗമായാണ് സംവിധാനം ഒരുക്കുന്നത്.
എല്ലാ സംസ്ഥാന-കേന്ദ്രഭരണ പ്രദേശങ്ങളിലെ വിദ്യാഭ്യാസ വകുപ്പുകളുമായി നടത്തിയ ചര്‍ച്ചകള്‍ക്ക് ശേഷമാണ് പരിശീലന പരിപാടികള്‍ തയ്യാറാക്കിയതെന്ന് മന്ത്രി പറഞ്ഞു. വിവിധ തലങ്ങളിലെ പരിശീലനങ്ങളാണ് നടത്തുക. പാഠ്യ പദ്ധതികള്‍, തൊഴിലധിഷ്ഠിത പദ്ധതികള്‍ എന്നിവ പരിശീലിപ്പിക്കേണ്ട സംവിധാനങ്ങളാണ് അദ്ധ്യാപകരെക്കൊണ്ട് തയ്യാറാക്കുന്നതെന്നും മന്ത്രി അറിയിച്ചു. ഈ മാസം 8-ാം തീയതി മുതല്‍ 25-ാം തീയതിവരെ ശിക്ഷാ പര്‍വ്വ് എന്ന പേരിലുള്ള ദേശീയ വിദ്യാഭ്യാസ നയം പരിചയപ്പെടുത്തുന്ന പരിപാടികളും നടന്നുവരികയാണെന്നും കേന്ദ്രമന്ത്രി പൊഖ്‌റിയാല്‍ അറിയിച്ചു.
