അറിയണം മറവിരോഗത്തിന്റെ ഈ ലക്ഷണങ്ങൾ

സെപ്റ്റംബർ 21ന് ലോക അൽഷിമേഴ്‌സ് ദിനം കടന്നുപോയി. മോഹൻലാലിന്റെ തന്മാത്ര സിനിമയിലൂടെ ആയിരിക്കും മലയാളികൾ ഒന്നടങ്കം അൽഷിമേഴ്‌സ് രോഗത്തിന്റെ തീവ്രത മനസിലാക്കിയിട്ടുണ്ടാകുക. അത്രമാത്രം ഭയാനകമായ ഈ രോഗത്തിന്റെ ലക്ഷണങ്ങൾ അറിഞ്ഞിരിക്കുന്നത് നല്ലതാണ്.

പ്രധാനമായും മൂന്നുഘട്ടങ്ങളിലൂടെയാണ് ഈ രോഗം കടന്നുപോകുന്നത്, പ്രാരംഭഘട്ടം, മധ്യഘട്ടം, അവസാനഘട്ടം.

ഓർമ നഷ്ടമായി തുടങ്ങി എന്ന ഒരാളുടെ തോന്നൽ തന്നെ അൽഷിമേഴ്‌സ് രോഗത്തിന്റെ പ്രധാന ലക്ഷണം ആണ്. എന്നാൽ അതേ സമയം അങ്ങനെ ഒരു തോന്നൽ ഉണ്ടായാൽ അൽഷിമേഴ്‌സ് ആവണം എന്നും ഇല്ല. അൽഷിമേഴ്‌സ് രോഗത്തിന്റെ ലക്ഷണങ്ങൾ അറിഞ്ഞിരിക്കുന്നത് നല്ലതാണ്.

1. ഏതെങ്കിലും വാക്കുകളോ സ്ഥലങ്ങളോ സാധാനങ്ങളോ ഓർമ്മിക്കാൻ സാധിക്കാതെ വരിക. രോഗം മൂർച്ഛിക്കുന്ന അവസ്ഥയിൽ പ്രിയപ്പെട്ടവരെ പോലും രോഗികൾ മറക്കും.

2. കുറച്ച് നാൾ മുന്നേ നിങ്ങൾ പ്രാഗൽഭ്യം തെളിയിച്ച കാര്യങ്ങൾ പലതും ചെയ്യാൻ സാധിക്കാതെ വരിക. രോഗം മൂർച്ഛിക്കുമ്പോൾ നിങ്ങളുടെ പ്രാഥമിക കാര്യങ്ങൾ ചെയ്യാൻ തന്നെ നിങ്ങൾ മറക്കും.

3. സമയമോ സ്ഥലമോ ഒന്നും ഓർമ്മയിൽ വരാതിരിക്കുക. സ്വന്തം അഡ്രസ്‌ പോലും മറന്നു പോവുക.

4. സ്വഭാവത്തിലും വ്യക്തിത്വത്തിലും മാറ്റങ്ങൾ ഉണ്ടാകുക.

5. അക്കങ്ങളും അക്ഷരങ്ങളും മറന്നുപോവുക.

6. കണക്കുകൂട്ടലുകൾ നടത്താൻ സാധിക്കാതെ വരിക.

7. തീരുമാനങ്ങൾ പലതും എടുക്കാൻ സാധിക്കാതെ വരും.

8. സംസാരിച്ചുകൊണ്ടിരുന്ന ഭാഷയും വാക്കുകളും വരെ മറക്കുന്ന അൽഷിമേഴ്‌സ് രോഗികൾ ഉണ്ട്.

9. ഇല്ലാത്തത് പലതും കണ്ടെന്നും കേട്ടെന്നും വരാം. മരിച്ചുപോയവരെ കണ്ടെന്നും അവരോട് സംസാരിച്ചുവെന്നും ചില രോഗികൾ പറയാറുണ്ട്.

10. ചുറ്റുമുള്ളവരെ സംശയ ദൃഷ്ടിയോട് കൂടിയായിരിക്കും നോക്കുക.

എപ്പോഴും തലച്ചോറിനെ തിരക്കിലാക്കുക എന്നതാണ് അൽഷിമേഴ്‌സ് രോഗത്തിൽ നിന്ന് രക്ഷപ്പെടുവാനുള്ള ആദ്യ വഴി. ജീൻ കാർപറിന്റെ പുസ്തകത്തിൽ പറയുന്നത് ഒരു പുസ്തകം വായിക്കുന്നതിനെക്കാൾ തലച്ചോറിന് വികാസം ഉണ്ടാക്കുന്നത് ഇന്റർനെറ്റിൽ കാര്യങ്ങൾ തിരയുമ്പോൾ ആണെന്നാണ്. മറ്റൊരു പഠനം പറയുന്നത് കാപ്പി കുടിച്ചാൽ അൽഷിമേഴ്‌സ് രോഗത്തെ പ്രതിരോധിക്കാം എന്നാണ്. വൈറ്റമിൻ D അടങ്ങിയ ഭക്ഷണപദാർഥങ്ങൾ കഴിക്കുന്നതും നല്ലതാണ്.