പാട്‌നാ: ബീഹാറിലെ തെരഞ്ഞെടുപ്പിന് മുന്നോടിയായ റാലികളില്‍ ബി.ജെ.പി ദേശീയ അദ്ധ്യക്ഷന്‍ ജെ.പി നദ്ദ പങ്കെടുത്തു. മഹാസഖ്യത്തിനെതിരെ ശക്തമായ പോരാട്ടമാണ് ഇത്തവണ കാഴ്ചവയ്‌ക്കുകയെന്ന് പറഞ്ഞ ജെ.പി.നദ്ദ കര്‍ഷകരുടെ ക്ഷേമം കേന്ദ്രസര്‍ക്കാറിന്റെ പ്രഥമ പരിഗണനയാണെന്നും വ്യക്തമാക്കി. പ്രധാനമന്ത്രി നരേന്ദ്രമോദിയും മുഖ്യമന്ത്രി നിതീഷ് കുമാറും ബീഹാറിന്റെ മുഖഛായ മാറ്റിയ പരിവര്‍ത്തനമാണ് ഭരണത്തിലൂടെ കാഴ്ചവെച്ചതെന്ന് നദ്ദ വ്യക്തമാക്കി.
രാജ്യത്താകമാനം ആരോഗ്യ മേഖലയ്‌ക്കും കാര്‍ഷിക മേഖലയ്‌ക്കും മോദി സര്‍ക്കാര്‍ ശക്തമായ ഉണര്‍വ്വാണ് നല്‍കിയത്. കേന്ദ്രപദ്ധതികള്‍ വിജയകരമായി നടപ്പാക്കിയ ബീഹാറിലെ നിതീഷ് കുമാര്‍ സര്‍ക്കാറിനും ജനങ്ങള്‍ക്കും നദ്ദ നന്ദി പറഞ്ഞു. മോദിയുണ്ടെങ്കില്‍ എന്തും സാധ്യമാണ്; നീതിഷിലൂടെ ബീഹാറിന്റെ മുന്നേറ്റം ഉറപ്പാണെന്ന മുദ്രാവാക്യവും നദ്ദ പ്രസംഗത്തിലൂടെ ഉയര്‍ത്തി.
തെരഞ്ഞെടുപ്പില്‍ മഹാസഖ്യം തുടക്കം മുതല്‍ അടിതെറ്റി നില്‍ക്കുകയാണ്. ശരദ്പവാറിന്റെ എന്‍.സി.പി കോണ്‍ഗ്രസ്സുമായി തെറ്റി ഒറ്റയ്‌ക്ക് മത്സരിക്കാന്‍ തീരുമാനിച്ചിരിക്കുകയാണ്. ഇടതു പക്ഷം 21 സീറ്റുകളില്‍ മത്സരിക്കുമെന്നാണ് വിവരം.
Comments