കാരണമില്ലാതെ ഉണ്ടാകുന്ന അസാധാരണമായ ഭയത്തെയാണ് ഫോബിയ എന്നു പറയുന്നത്. ഉയര്‍ന്ന സ്ഥലങ്ങളില്‍ പോകുമ്പോള്‍, പാമ്പിനെ കാണുമ്പോള്‍, വിമാനത്തില്‍ യാത്ര ചെയ്യുമ്പോള്‍, ഇരുട്ടിനെ എന്നിങ്ങനെ പല തരത്തിലുളള ഭയം ആളുകള്‍ക്ക് ഉണ്ടാകാറുണ്ട്. എന്നാല്‍ വരാന്‍ പോകുന്ന അപകടത്തെ കുറിച്ച്, യുക്തിസഹമല്ലാത്ത ചിന്തകള്‍, അനാവശ്യമായ മുന്‍വിധികള്‍ എന്നിവയും അതിനെ കുറിച്ചുള്ള അമിതമായ ഉത്കണ്ഠയും ഉളളില്‍ ഭയമായി മാറുന്നു. ഉയരമുള്ള കെട്ടിടങ്ങള്‍ കാണുമ്പോള്‍ പാമ്പിന്റേയും മൃഗങ്ങളുടേയുമെല്ലാം ചിത്രങ്ങള്‍ കാണുമ്പോള്‍ അമിതമായി പേടിക്കുകയും ഗുരുതരമായി ഉത്കണ്ഠ കൂട്ടുകയും ചെയ്യുന്നു. ഇത്തരത്തില്‍ ആളുകളില്‍ ഉണ്ടാകുന്ന ഭയമാണ് ഫോബിയ. ഇതൊരു മാനസിക പ്രശ്‌നമായി തന്നെ കണക്കാക്കാവുന്നതാണ്.
ഇത്തരത്തില്‍ ഭയം ഉണ്ടാകുന്ന സാഹചര്യത്തില്‍ ആളുകള്‍ക്ക് നെഞ്ചിടിപ്പ് വര്‍ദ്ധിക്കുകയും, ശരീരം വല്ലാതെ വിയര്‍ക്കുകയും, തല കറങ്ങുന്നതു പോലെ തോന്നുകയും തുടങ്ങി ഒരുപാട് ശാരീരിക ബുദ്ധിമുട്ടുകള്‍ ഉണ്ടാകുന്നു. കുട്ടിക്കാലത്ത് വളരെ പേടിപ്പെടുത്തുന്ന തരത്തില്‍ അല്ലെങ്കില്‍ മനസ്സിന് വളരെ വലിയ ആഘാതം ഏല്‍പ്പിക്കുന്ന തരത്തിലുള്ള എന്തെങ്കിലും അപകടങ്ങളോ സംഭവങ്ങളോ ഉണ്ടായിട്ടുണ്ട് എങ്കില്‍ മുതിര്‍ന്ന ശേഷം അത്ഫോബിയയായി മാറിയേക്കാം. കൂടാതെ മാനസിക അസ്വസ്ഥതയുളള മാതാപിതാക്കളുടെ മക്കളിലും, അമിതമായ മാനസിക സംഘര്‍ഷം അനുഭവിച്ചു കൊണ്ടിരിക്കുന്ന ആളുകളിലും ഫോബിയ ഉണ്ടായേക്കാം.
കൂടാതെ ഇത്തരത്തില്‍ മാനസിക അസ്വസ്ഥത അനുഭവിക്കുന്നവരുടെ ഭയവും ഉത്കണ്ഠയും വളരെ സത്യസന്ധമാണ്. അതുകൊണ്ട് തന്നെ അതിന്റെ പേരില്‍ അവരെ അവഗണിക്കുകയോ പരിഹസിക്കുകയോ ചെയ്യരുത്. കാരണം ഇത്തരം ആളുകള്‍ക്ക് മാനസിക പിന്തുണ ആവശ്യമാണ്. മറ്റു ബുദ്ധിമുട്ടുകള്‍ ഒന്നും ഇല്ലാത്തതു കൊണ്ടു തന്നെ ഫോബിയയെ ആരും അത്ര കാര്യമായി എടുക്കാറില്ല, വേണ്ട ചികിത്സയും നടത്തുകയില്ല. എന്നാല്‍ ഒരു മാനസികാരോഗ്യ ഡോക്ടറുടെ സഹായം തേടേണ്ടത് വളരെ പ്രധാനപ്പെട്ട കാര്യം തന്നെയാണ്.
Comments