തിളക്കത്തിന് മങ്ങൽ ഏൽക്കാതെ , പ്രണയത്തിന് മാറ്റു കുറയാതെ ഇന്നും പ്രേക്ഷക മനസ്സിൽ നിറഞ്ഞു നിൽക്കുന്ന സിനിമയാണ് ഇരുപത്തിയഞ്ച് കൊല്ലം മുമ്പ് ഇറങ്ങിയ ദിൽവാലെ ദുൽഹനിയ ലേ ജായേംഗെ . സ്വദേശത്തോടുള്ള സ്നേഹത്തിന് കോട്ടം ഒന്നും തന്നെ തട്ടാതെ വിദേശത്ത് ജീവിക്കുന്ന രണ്ടു കുടുംബങ്ങളുടെയും , അതിൽ ഉൾപ്പെട്ട രണ്ടു വ്യക്തികളുടെ പ്രണയത്തെയും പ്രമേയമാക്കി അവതരിപ്പിച്ച ചിത്രം ഇന്നും പ്രേക്ഷകർ കാണുകയും ആസ്വദിക്കുകയും ചെയ്യുന്ന ചിത്രങ്ങളിൽ ഒന്നാണ് .
സ്വിറ്റ്സർലണ്ടിലും ഇന്ത്യയിലുമായി ചിത്രീകരിച്ച ചിത്രം സംവിധാനം ചെയ്തത് പ്രശസ്ത സംവിധായകൻ ആയ യാഷ് ചോപ്രയുടെ പുത്രൻ ആദിത്യ ചോപ്ര ആയിരുന്നു . ഷാരൂഖ് ഖാനും , കജോളും കേന്ദ്ര കഥാപാത്രങ്ങളെ അവതരിപ്പിച്ച ഈ ചിത്രത്തിൽ ഇവർക്കൊപ്പം അന്തരിച്ച നടൻ അമരീഷ് പുരി , ഫരീദ ജലാൽ , അനുപം ഖേർ , മന്ദിര ബേദി എന്നിവരും പ്രധാന വേഷത്തിൽ എത്തിയിരുന്നു .
1995 ൽ പുറത്തിറങ്ങിയ ചിത്രത്തിൽ ബോളിവുഡിലെ ഹിറ്റ് പ്രണയ ജോഡികളായ ഷാരൂഖ് ഖാനും കജോളും , രാജ് – സിമ്രാൻ എന്ന പേരുള്ള കഥാപാത്രങ്ങൾ ആയിട്ടാണ് ചിത്രത്തിൽ എത്തിയത് . കുടുംബബന്ധങ്ങൾക്ക് മൂല്യം കൊടുക്കുന്ന ഇരുവരും പ്രണയത്തിലായി എങ്കിലും വീട്ടുകാരുടെ സമ്മതത്തോടെ മാത്രം വിവാഹം കഴിക്കൂ എന്ന് എടുത്ത തീരുമാനത്തിലൂടെ ആണ് ചിത്രം പുരോഗമിക്കുന്നത് .
ഒരു ചിത്രത്തിലെ എല്ലാ പാട്ടുകളും ഹിറ്റ് ആകുക എന്നത് അക്കാലത്ത് ഒരു സ്ഥിരം സംഭവമായിരുന്നു . അതുപോലെ തന്നെ ഈ ചിത്രത്തിലെ എല്ലാ പാട്ടുകളും പ്രേക്ഷകരുടെ ഹൃദയം കീഴടക്കിയവയാണ് . ഇന്നും ഈ ചിത്രത്തിലെ ഒരു പാട്ടെങ്കിലും ഓർക്കാത്തവരോ കേൾക്കാത്തവരോ കാണില്ല .ദിൽവാലെ ദുൽഹനിയ ലേ ജായേംഗെ ഇറങ്ങിയ സമയത്ത് തീയേറ്ററിൽ പോയി കണ്ടവർക്കെല്ലാം തന്നെ ഈ ചിത്രത്തെ കുറിച്ച് പറയാൻ ഒരുപാടോർമ്മകൾ കാണും .
പൂർണ്ണമായും ഒരു കുടുംബ ചിത്രമായിരുന്നു ദിൽവാലെ ദുൽഹനിയ ലേ ജായേംഗെ , രണ്ടു ദേശങ്ങളുടെ ജീവിതവും സംസ്കാരവും മനോഹരമായി തന്നെ ആവിഷ്കരിച്ച ചിത്രമായിരുന്നു .ഒരിക്കൽ കൂടി ഈ ചിത്രം കാണാൻ ആഗ്രഹിക്കാത്തവർ ഇന്നും വിരളമായിരിക്കും .
Comments