ഇനി തണ്ണീർമത്തൻ ദിനങ്ങൾ

തണ്ണീർമത്തൻ കൃഷിക്ക് ഏറ്റവും അനുയോജ്യമായ സമയമാണിത്. ഇപ്പോൾ കൃഷിചെയ്യുകയാണെങ്കിൽ മാർച്ചിൽ വിളവെടുക്കാം. നല്ല സൂര്യപ്രകാശമുള്ള പറമ്പിലും പാടങ്ങളിലും തണ്ണീർമത്തൻ കൃഷി അനുയോജ്യമാണ്. പരമ്പരാഗത രീതിയിൽ മണ്ണിൽ കുഴിയെടുത്താണ് തണ്ണീർമത്തൻ കൃഷി നടത്തുക. മണൽ കലർന്ന പശിമരാശി മണ്ണാണ് തണ്ണീർമത്തനു ഏറ്റവും അനുയോജ്യം. തണ്ണീർമത്തന്റെ വിത്തിട്ടതിനുശേഷം ആദ്യഘട്ടത്തിൽ രണ്ടു ദിവസത്തിൽ ഒരിക്കൽ നന്നായി നനയ്‌ക്കണം. പൂവിടുമ്പോഴും കായയാകുമ്പോഴും മണ്ണിന്റെ ഈർപ്പത്തിനനുസരിച്ച് നന ക്രമീകരിക്കണം. കായ്കൾ മൂപ്പെത്തിക്കഴിഞ്ഞാൽ ജലസേചനം കുറയ്‌ക്കാം. വിളവെടുപ്പിന്റെ സമയമാകുമ്പോഴേക്കും പൂർണ്ണമായി ജലസേചനം നിർത്താം.

കൃഷിക്കായി കുഴിയെടുക്കുമ്പോൾ നല്ല ഇടയകലം നൽകണം. അതുപോലെ നല്ല വളപ്രയോഗവും നടത്തണം. ചാണകസ്ലറി, വെർമികമ്പോസ്റ്റ്, ട്രൈക്കോഡെർമ സമ്പുഷ്ടീകരിച്ച ജൈവവളം, ഫിഷ് അമിനോ ആസിഡ്, ജീവാമൃതം തുടങ്ങിയവ ഫലപ്രദമായ വളപ്രയോഗങ്ങളാണ്. തണ്ണിമത്തന്റെ വള്ളി പടർത്തുന്നതിന് ഉണങ്ങിയ കമ്പുകൾ, ഓല, വൈക്കോൽ എന്നിവ നിരത്തിക്കൊടുക്കുന്നതും അനുയോജ്യമാണ്. ഷുഗർബേബി, അർക്കജ്യോതി, അർക്കമണിക്, ശോണിമ, സ്വർണ എന്നിവ തണ്ണീർമത്തന്റെ വിവിധ ഇനങ്ങളാണ്. അതുപോലെ തണ്ണീർമത്തൻ പ്രിസിഷൻ ഫാമിങ്ങിലൂടെയും കൃഷി ചെയ്തെടുക്കാൻ സാധിക്കും.

പോഷകങ്ങൾ, ഇരുമ്പ്, സിങ്ക്, ഫൈബർ, പ്രോട്ടീൻ എന്നിവ അടങ്ങിയിട്ടുള്ള തണ്ണീർമത്തൻ ഹൃദ്രോഗത്തിന്റെയും പ്രമേഹത്തിന്റെയും സാധ്യത കുറയ്‌ക്കുന്നതിനും ഏറെ ഗുണകരമാണ്. ഒപ്പം ശരീരഭാരം നിയന്ത്രിക്കുവാനും, രോഗപ്രതിരോധശേഷി വർദ്ധിപ്പിക്കുവാനും കൂടി ഉപകരിക്കുന്ന പോഷകഗുണങ്ങളുള്ള ഭക്ഷ്യ വസ്തുവാണ് തണ്ണീർമത്തൻ. തണ്ണീർമത്തന്റെ കുരുക്കളും ശരീരത്തിന് നല്ലതാണ്. കുരുക്കളിലും ശരീരത്തിന് വേണ്ട പോഷകമൂല്യങ്ങൾ അടങ്ങിയിട്ടുണ്ട്. പ്രത്യേകിച്ചും ചൂടുകാലങ്ങളിലൊക്കെ തണ്ണീർമത്തൻ കഴിക്കുന്നത് ആരോഗ്യത്തിനു ഗുണം ചെയ്യുന്നു. ഇന്ത്യൻ ഇൻസ്റ്റിറ്റ്യൂട്ട് ഓഫ് ഹോർട്ടികൾചറൽ റിസർച്ചിൽനിന്നും, വെള്ളാനിക്കര ഹോർട്ടികൾചർ കോളജിലും, പാലക്കാട് നാഷനൽ സീഡ്സ് കോർപറേഷനിലും തണ്ണീർമത്തന്റെ വിത്തുകൾ ലഭ്യമാണ്.