രുചിയും മണവും മാത്രമല്ല ആരോഗ്യവും നല്‍കുന്ന ഒന്നാണ് കറുവാപ്പട്ട

രുചിയും മണവും മാത്രമല്ല ഔഷധ ഗുണമുള്ള ഒന്നു കൂടിയാണ് കറുവാപ്പട്ട. കറിമസാലകളിലാണ് ഏറ്റവും കൂടുതലായി കറുവാപ്പട്ട ഉപയോഗിക്കുന്നത്. ആരോഗ്യത്തിന് വളരെ ഗുണപ്രദമായ ഇത് പല അസുഖങ്ങള്‍ക്കുമുളള ഒരു മരുന്നു കൂടിയാണ്. കറുവപ്പട്ട പൊടിച്ചത് അല്പം തേനില്‍ ചാലിച്ചു പതിവായി കഴിച്ചാല്‍ വായു കോപം ശമിക്കുകയും ദഹനക്കേട് മാറുകയും ചെയ്യുന്നു. മൂത്രതടസം, മൂത്രനാളിയിലും യോനിയിലുമുള്ള അണുബാധ എന്നിവ ഇല്ലാതാക്കാന്‍ ഇത് സഹായിക്കുന്നു. കറുവപ്പട്ട എടുത്തു വായിലിട്ടു ചവച്ചാല്‍ ദന്തക്ഷയം കുറയുകയും മോണ രോഗം ഇല്ലാതാകുകയും പല്ലിനു തിളക്കം കൂടുകയും ചെയ്യുന്നു.

കറുവപ്പട്ട ഒരു ഗ്ലാസ് വെളളത്തിലിട്ട് ഒരു നുള്ള് കുരുമുളകു പൊടിയും തേനും ചേര്‍ത്ത് കഴിച്ചാല്‍ തൊണ്ടയടപ്പ് ഇല്ലാതാക്കുന്നു. തലവേദന ശമിക്കാന്‍ കറുവ പൊടിച്ചു വെള്ളത്തില്‍ ചാലിച്ചു നെറ്റിയില്‍ പുരട്ടുന്നത് നല്ലതാണ്. പ്രമേഹ രോഗിയുടെ രക്തത്തിലുള്ള പഞ്ചസാരയുടെ അളവ് നിയന്ത്രിക്കുകയും പ്രമേഹത്തെ കുറയ്‌ക്കുകയും ചെയ്യുന്നു. കറുവപ്പട്ടയുടെ ഇല, ഞെട്ട്, പട്ടയുടെ കഷണങ്ങള്‍ എന്നിവ ഉപയോഗിച്ചാണ് കറുവ തൈലം ഉണ്ടാക്കുന്നത്. കറുവ തൈലം തേനില്‍ ചേര്‍ത്ത് കഴിച്ചാല്‍ ജലദോഷത്തിന്റെ തീവ്രത കുറയും.

പല്ലുവേദന ശമിക്കാന്‍ ഒരു ചെറിയ കഷണം പഞ്ഞി കറുവ തൈലത്തില്‍ മുക്കിയെടുത്ത് പല്ല് വേദന ഉളള സ്ഥലത്ത് വയ്‌ക്കുക. ഇത് വേദനയ്‌ക്ക് ആശ്വാസം നല്‍കുന്നു. ടൂത്തപേസ്റ്റ്, സോപ്പ്, സുഗന്ധ വ്യഞ്ജനങ്ങള്‍,കീടനാശിനികള്‍, എന്നിവയുടെ നിര്‍മാണത്തിനും കറുവ തൈലം ഉപയോഗിക്കുന്നു. സൗന്ദര്യ സംരക്ഷണത്തിനും ഏറെ നല്ലതാണ് കറുവാപ്പട്ട. മുഖക്കുരുവിന്റെ വേദന അകറ്റാനും അതുമൂലം ഉണ്ടാകുന്ന പാടുകള്‍ ഇല്ലാതാക്കാനും കറുവപ്പട്ട പൊടിച്ചു നാരങ്ങ നീരില്‍ ചാലിച്ചു പുരട്ടിയാല്‍ മതി.