ബൈഡനെ അഭിനന്ദിക്കാൻ മടിച്ച് മെക്‌സിക്കൻ പ്രസിഡന്റ്; പ്രതികരണം ചർച്ചയാക്കി മാദ്ധ്യമങ്ങൾ

വാഷിംഗ്ടൺ: യുഎസിൽ ഡെമൊക്രാറ്റ് സ്ഥാനാർത്ഥികളായ ജോ ബൈഡനും കമലാ ഹാരിസിന്റേയും വിജയം ആഘോഷിക്കുകയാണ് ലോകം. ലോകമെമ്പാടുമുള്ള ആളുകളിൽ നിന്ന് ബൈഡന് ആശംസകളെത്തുമ്പോൾ അഭിനന്ദിക്കാൻ മടിച്ച മെക്‌സിക്കൻ പ്രസിഡന്റിന്റെ പ്രതികരണവും ചർച്ചയാകുകയാണ്. പ്രസിഡന്റ് തെരഞ്ഞെടുപ്പിലെ നിയമപരമായ വെല്ലുവിളികൾ അവസാനിച്ച ശേഷം അഭിനന്ദിക്കാമെന്നാണ് പ്രസിഡന്റ് മാനുവൽ ലോപസ് ഒബ്രഡോറിന്റെ പ്രതികരണം.

അമേരിക്കയുമായി വ്യാപാര ബന്ധത്തിൽ ഏറെ അടുത്ത് നിൽക്കുന്ന രാജ്യമാണ് മെക്‌സിക്കോ. ആറായിരം ബില്യൺ ഡോളറിന്റെ വ്യാപാരമാണ് ഇരുരാജ്യങ്ങളും തമ്മിലുള്ളത്. വടക്കൻ അതിർത്തിയിലെ വ്യാപാര ബന്ധങ്ങൾ ഉലയാതെയിരിക്കാനുള്ള മുൻകരുതലാണ് ഇതെന്നാണ് സൂചന. അമേരിക്കൻ പ്രസിഡന്റ് തെരഞ്ഞെടുപ്പുമായി ബന്ധപ്പെട്ട നിയമത്തിന്റെ എല്ലാ വല്ലുവിളികളും അവസാനിക്കുന്നത് വരെ കാത്തിരിക്കാനാണ് തീരുമാനമെന്ന് മാനുവൽ വാർത്താ സമ്മേളത്തിൽ പറഞ്ഞു. ഇലക്ട്രൽ നടപടി പൂർത്തിയാകുന്നത് വരെ ആരേയും അഭിനന്ദിക്കില്ലെന്നും അദ്ദേഹം കൂട്ടിച്ചേർത്തു.

ഇരു സ്ഥാനാർത്ഥികളുമായും നല്ല ബന്ധമാണ് ഞങ്ങൾക്കുള്ളത്. വിവേകപരമായി തീരുമാനമെടുക്കേണ്ട സമയമാണിത്. ട്രംപുമായി വാദപ്രതിവാദങ്ങൾ ഉണ്ടായിട്ടുണ്ടെങ്കിലും ധാരാളം കരാറിൽ ഞങ്ങൾ ഏർപ്പെട്ടിരുന്നു. അതുകൊണ്ട് പ്രസിഡന്റ് തെരഞ്ഞെടുപ്പിലെ നിയമപരമായ എല്ലാ വെല്ലുവിളികളും അവസാനിച്ച ശേഷം പ്രതികരിക്കുമെന്ന് അദ്ദേഹം പറഞ്ഞു.

അതേസമയം പെൻസിൽവാനിയയിൽ വോട്ടെണ്ണൽ പൂർത്തിയായതോടെയാണ് ബൈഡൻ വിജയം ഉറപ്പിച്ചത്. 49.7 ശതമാനം വോട്ടുകളാണ് ബൈഡൻ സ്വന്തമാക്കിയത്. മുപ്പതിനായിരത്തിലധികം വോട്ടുകളുടെ ഭൂരിപക്ഷം ബൈഡൻ നേടിയിട്ടുണ്ട്. പെൻസിൽവാനിയയിൽ ട്രംപ് 33,11,448 വോട്ടുകൾ നേടിയപ്പോൾ 33,45,906 വോട്ടുകൾ സ്വന്തമാക്കിയാണ് ബൈഡൻ വിജയം ഉറപ്പിച്ചത്.