ആർടിപിസിആർ ഫലം പിഴച്ചു: ചിരഞ്ജീവിയുടെ കൊറോണ പരിശോധനാ ഫലം നെഗറ്റീവ്

ബെംഗളൂരു: തെലുങ്ക് സൂപ്പർ താരം ചിരഞ്ജീവിയുടെ കൊറോണ പോസീറ്റീവ് ആണെന്ന ഫലം തെറ്റെന്ന് താരം. ആർടിപിസിആർ കിറ്റിന്റെ പിഴവായിരുന്നു അതെന്ന് ചിരഞ്ജീവി അറിയിച്ചു. തിങ്കളാഴ്ച കൊറോണ പോസിറ്റീവ് ആയെങ്കിലും പിന്നീട് നടത്തിയ പരിശോധനയിൽ വൈറസ് ബാധ ഇല്ലെന്ന് കണ്ടെത്തുകയായിരുന്നു. മൂന്ന് തവണ ഡോക്ടർമാർ ടെസ്റ്റ് ചെയ്തപ്പോഴും നെഗറ്റീവ് ആയിരുന്നു ഫലമെന്ന് ചിരഞ്ജീവി ട്വിറ്ററിൽ കുറിച്ചു.

പുതിയ സിനിമ ആചാര്യയുടെ ചിത്രീകരണം ആരംഭിക്കുന്നതിന് മുന്നോടിയായി നടത്തിയ പരിശോധനയിലാണ് നടന് വൈറസ് ബാധ സ്ഥിരീകരിച്ചത്. ചിരഞ്ജീവി തന്നെയാണ് ഇക്കാര്യം പുറത്തുവിട്ടതും. താനുമായി ബന്ധപ്പെട്ടിട്ടുള്ള എല്ലാവരും ക്വാറന്റീനിൽ പോകണമെന്നും താരം നേരത്തെ ആവശ്യപ്പെട്ടിരുന്നു.

കൊരട്ടാല ശിവയാണ് ആചാര്യ സംവിധാനം ചെയ്യുന്നത്. ചിത്രത്തിന്റെ രചനയും അദ്ദേഹത്തിന്റേതാണ്. ലോക്ക്ഡൗണിനെ തുടർന്ന് മാർച്ചിൽ സിനിമയുടെ ചിത്രീകരണം നിർത്തിവയ്‌ക്കേണ്ടി വന്നിരുന്നു. കാജൽ അഗർവാളാണ് ചിത്രത്തിൽ നായികയായി എത്തുന്നത്.

A group of doctors did three different tests and concluded that I am Covid negative & that the earlier result was due to a faulty RT PCR kit. My heartfelt thanks for the concern, love shown by all of you during this time. Humbled ! 🙏❤️ pic.twitter.com/v8dwFvzznw

— Chiranjeevi Konidela (@KChiruTweets) November 12, 2020