മുംബൈ ഭീകരാക്രമണത്തില്‍ വീരമൃത്യു വരിച്ച മേജര്‍ സന്ദീപ് ഉണ്ണികൃഷ്ണന്റെ ജീവിതം വരച്ചിടുന്ന ‘മേജര്‍’ സിനിമയുടെ നിര്‍മാണം അവസാനഘട്ടത്തിലേക്ക്. ചിത്രത്തില്‍ സന്ദീപ് ഉണ്ണികൃഷ്ണനായി വേഷമിടുന്ന അദിവി സേഷിന്റെ അനുഭവങ്ങളും പ്രചോദനവും വിവരിക്കുന്ന വീഡിയോ അണിയറ പ്രവര്‍ത്തകര്‍ സോഷ്യല്‍ മീഡിയയില്‍ പങ്കുവെച്ചു.
സന്ദീപിന്റെ ജീവിതമാണ് സിനിമ ആഘോഷിക്കുന്നതെന്നും മരണമല്ലെന്നും തെലുങ്ക് നടനും സംവിധായകനും തിരക്കഥാകൃത്തുമായ അദിവി സേഷ് പറയുന്നു. മേജര്‍ സന്ദീപ് ഉണ്ണികൃഷ്ണനായി അഭിനയിക്കാന്‍ കരാര്‍ ഒപ്പിട്ടതുമുതലുള്ള അനുഭവങ്ങളാണ് വീഡിയോയില്‍ പറയുന്നത്. അദിവി സേഷ് തന്നെയാണ് തിരക്കഥ എഴുതുന്നതും. സന്ദീപിനെക്കുറിച്ച് അറിഞ്ഞപ്പോള്‍ മുതല്‍ അയാള്‍ തന്റെ ജീവിതത്തെ സ്വാധീനിച്ചതായി അദിവി പറയുന്നു.
2008 ല്‍ സന്ദീപിന്റെ ചിത്രങ്ങള്‍ ടെലിവിഷന്‍ ചാനലുകളില്‍ കണ്ടപ്പോള്‍ മുതല്‍ ഈ മനുഷ്യന്‍ ആരാണെന്ന അതിശയത്തിലായിരുന്നു താനെന്നും അദിവി പറയുന്നു. സന്ദീപിന്റെ മാതാപിതാക്കളെ കണ്ട അനുഭവവും അദിവി പങ്കുവയ്‌ക്കുന്നുണ്ട്.
തെലുങ്ക് സൂപ്പര്‍താരം മഹേഷ് ബാബുവിന്റെ ഉടമസ്ഥതയിലുള്ള ജി.മഹേഷ് ബാബു എന്റര്‍ടെയ്ന്‍മെന്റ്‌സും സോണി പിക്ചേഴ്‌സും ചേര്‍ന്നാണ് ചിത്രം നിര്‍മ്മിക്കുന്നത്. മഹേഷ് ബാബുവാണ് വീഡിയോ ട്വിറ്ററില്‍ പങ്കുവെച്ചത്. ശശി കിരണ്‍ ടിക്കയാണ് ചിത്രം സംവിധാനം ചെയ്യുന്നത്. ഹിന്ദിയിലും തെലുങ്കിലുമാണ് ചിത്രമൊരുങ്ങുന്നത്.
