മുന്നണികളെ തറപറ്റിച്ച് ട്വന്റി ട്വന്റിയുടെ മുന്നേറ്റം വീണ്ടും; കിഴക്കമ്പലത്തിന് പുറമേ ഐക്കരനാടും മഴുവന്നൂരും

കൊച്ചി: കോര്‍പ്പറേറ്റ് ഭരണമെന്ന അധിക്ഷേപത്തിന് മറുപടിയുമായി കിഴക്കമ്പലത്തെ ട്വന്റി ട്വന്റി തരംഗം വീണ്ടും. തൊട്ടടുത്ത പഞ്ചായത്തായ ഐക്കരനാടും മഴുവന്നൂര്‍ പഞ്ചായത്തും അടക്കം അഞ്ച് പഞ്ചായത്തുകളേയും പിടിക്കുന്നതരത്തിലേക്ക് ട്വന്റി ട്വന്റി ജനകീയ അടിത്തറ വ്യാപിപ്പിച്ചിരിക്കുകയാണ്. കിറ്റക്‌സ് കമ്പനി ഉടമ സാബു ജേക്കബിന്റെ നേതൃത്വത്തിലാണ് ട്വന്റി ട്വന്റി എന്ന സഹകരണ ശൈലിയിലുള്ള ഭരണ സംവിധാനം പരീക്ഷിക്കപ്പെട്ടത്.

2015ല്‍ 19 സീറ്റില്‍ 17 ഉം പിടിച്ചാണ് വികസന നേട്ടങ്ങള്‍ ജനങ്ങളിലേക്ക് ട്വന്റി ട്വന്റി എത്തിച്ചത്. ആകെ 69 ശതമാനം വോട്ടുകളാണ് നേടിയത്. ഗ്രാമത്തെ എല്ലാ സൗകര്യങ്ങളുമുള്ള പ്രദേശങ്ങളാക്കി മാറ്റുക എന്നതാണ് ട്വന്റി ട്വന്റി മുന്നോട്ട് വക്കുന്ന ലക്ഷ്യം. കിഴക്കമ്പല ത്തിലെ പഞ്ചായത്തില്‍ വികസന പ്രവര്‍ത്തനങ്ങളില്‍ 13.5 കോടിരൂപ മിച്ചം പിടിക്കാനായി എന്ന നേട്ടമാണ് പ്രചാരണത്തില്‍ ഭരണരംഗത്തെ മികവായി ട്വന്റി ട്വന്റി ഉയര്‍ത്തിക്കാട്ടിയത്. ഒപ്പം സൂപ്പര്‍ മാര്‍ക്കറ്റും വീട് നിര്‍മ്മാണവും പ്രളയ ദുരിതാശ്വാസവും കൊറോണ പ്രതിരോധ പ്രവര്‍ത്തനങ്ങളും നേട്ടമായി ചൂണ്ടിക്കാട്ടുന്നു.

കമ്യൂണിസ്റ്റ് കോണ്‍ഗ്രസ്സ് നേതാക്കളെ തോല്‍പ്പിച്ചാണ് ആദ്യമായി ട്വന്റി ട്വന്റി കിഴക്കമ്പലം ഗ്രാമപഞ്ചായത്തില്‍ അധികാരത്തിലെത്തിയത്. രാഷ്‌ട്രീയ ശത്രുത കടുത്തതോടെ വോട്ടെടുപ്പിന്റെ ദിവസം കിഴക്കമ്പലം ഗ്രാമപഞ്ചായത്തിലെ 7-ാം വാര്‍ഡായ കുമ്മനോടില്‍ വോട്ടു ചെയ്യാനെത്തിയ പ്രിന്റുവിനെ മര്‍ദ്ദിച്ച സംഭവം വിവാദമായിരുന്നു. ഭാര്യയുടെ മുന്നില്‍വെച്ച് പോലീസ് നോക്കിനില്‍ക്കേ രാഷ്‌ട്രീയ പാര്‍ട്ടി നേതാക്കളുടെ മര്‍ദ്ദനം ഏല്‍ക്കേണ്ടിവന്നതെന്നാണ് സാബു ജേക്കബിന്റെ ആരോപണം. അതേ വാര്‍ഡും വിജയിച്ചതിന്റെ ആത്മവിശ്വാസത്തിലാണ് ട്വന്റി ട്വന്റി നേതാക്കള്‍.