സൂപ്പർ പോരാട്ടത്തിൽ മിലാനെ തകർത്ത് യുവന്റസ്; ചെസിയയ്‌ക്ക് ഇരട്ട ഗോൾ

മിലാൻ: ഇറ്റാലിയൻ ലീഗിൽ എ.സി.മിലാനെ യുവന്റസ് വീഴ്‌ത്തി. ഒന്നിനെതിരെ മൂന്ന് ഗോളുകൾക്കാണ് ക്രിസ്റ്റ്യാനോയുടെ ടീം മിലാന് മേൽ ആധികാരിക ജയം നേടിയത്. ഫെഡ്രികോ ചെസിയയുടെ ഇരട്ട ഗോളുകളാണ് യുവന്റസിന് മികച്ച ജയം നൽകിയത്.

കളിയുടെ 18-ാം മിനിറ്റിൽത്തന്നെ നിലവിലെ ലീഗ് ചാമ്പ്യന്മാരായ യുവന്റസ് ലീഡ് നേടി. ചെസിയയാണ് ആദ്യ ഗോൾ നേടിയത്. എന്നാൽ ഒന്നാം പകുതി അവസാനിക്കും മുന്നേ എ.സി.മിലാൻ തിരിച്ചടിച്ചു. 42-ാം മിനിറ്റിൽ ദാവീദ് കലാബ്രിയയാണ് സമനില പിടിച്ചത്.

രണ്ടാം പകുതിയിൽ യുവന്റസ് വീണ്ടും മുന്നിലെത്തി. 62-ാം മിനിറ്റിൽ ചെസിയ തന്റെ ഇരട്ട ഗോൾ തികച്ചുകൊണ്ട് ടീമിനെ 2-1ന് മുന്നിലെത്തിച്ചു. 76-ാം മിനിറ്റിൽ ജയം ആധികാരി കമാക്കി വെസ്റ്റൺ മെക്കെന്നേ മൂന്നാം ഗോളും സ്വന്തമാക്കി. ജയത്തോടെ യുവന്റസ് 15 കളികളിലായി 30 പോയിന്റുമായി നാലാം സ്ഥാനത്തേക്ക് കയറി. ലീഗിൽ തോറ്റെങ്കിലും 16 മത്സരം കളിച്ച മിലാൻ 37 പോയിന്റുകളുമായി ഒന്നാം സ്ഥാനത്ത് തുടരുകയാണ്.