ഇസ്ലാമാബാദ്: ഇന്ത്യൻ യുവനിര ഓസ്‌ട്രേലിയയെ തകർത്ത് നേടിയ ത്രസിപ്പിക്കുന്ന പരമ്പര നേട്ടത്തിന്റെ അലയൊലി പാകിസ്താനിലും. ഇന്ത്യൻ വിജയത്തെ സ്വന്തം വിജയം പോലെ ആഘോഷിക്കുന്ന പാകിസ്താൻ ക്രിക്കറ്റ് ആരാധകരുടെ പ്രതികരണങ്ങളാണ് വൈറലാകുന്നത്. പരമ്പരാഗത വൈര്യം ഉള്ളിലുണ്ടെങ്കിലും വിദേശമണ്ണിലെ ഇന്ത്യൻ ജയം സ്വന്തം ജയത്തോളം പോന്നതാണെന്ന് പറയാൻ പാകിസ്താൻ ആരാധകർ മടികാണിച്ചില്ല.
മുൻ അന്താരാഷ്‌ട്രതാരവും പാകിസ്താൻ ക്യാപ്റ്റനുമായിരുന്ന ലോകോത്തര ബൗളർ വസിം അക്രമാണ് ഇന്ത്യൻ വിജയത്തിന് എല്ലാ പ്രശംസയും അർപ്പിച്ച പ്രമുഖ താരം. ‘ഇന്ത്യ ഇത്രയും ധീരതയും ആക്രമണ സ്വഭാവവും ഓസീസ് മണ്ണിൽ ഇതിന് മുമ്പ് കാണിച്ചതായി ഓർക്കുന്നില്ല. എല്ലാ പ്രതിസന്ധികളേയും അഭിമുഖീകരിച്ച് നേടിയ വിജയമാണിത്. 36 റൺസിൽ ഓൾ ഔട്ടായ ഒരു ടീം പരമ്പര നേടി നാട്ടിലേക്ക് വരുന്നു. ഇന്ത്യൻ ടീമിന് അഭിവാദനങ്ങൾ.’ വസിം അക്രം ട്വീറ്റ് ചെയ്തു.
ടീം ഇന്ത്യയുടെ വിജയം ഏറ്റവും മികച്ച ക്രിക്കറ്റ് അനുഭവമെന്നാണ് ഷൊഐബ് അക്തർ പ്രതികരിച്ചത്. പരിക്കുകൾ വലിയ പ്രതിസന്ധിയായിട്ടും ഇന്ത്യ നേടിയ ജയത്തെ പ്രകീർത്തിച്ച് ഷാഹിദ് അഫ്രിദിയും ട്വീറ്റ് ചെയ്തു. കളിയുടെ ഓരോ നിമിഷവും ആവേശം തീർത്തെന്ന കമന്റുകളാണ് പാകിസ്താനിലെ സമൂഹമാദ്ധ്യമങ്ങളിൽ ക്രിക്കറ്റ് ആരാധകർ പങ്കുവെയ്‌ക്കു ന്നത്. ട്വീറ്റുകള്‍ നിറഞ്ഞതോടെ പാകിസ്താനില്‍ ഇന്ത്യയ്‌ക്കുളള അഭിനന്ദന സന്ദേശങ്ങള്‍ ട്രെന്‍ഡിംഗാകുകയും ചെയ്തു.
Comments