സിന്ധു സെമിയിൽ; തോൽപ്പിച്ചത് യമാഗൂച്ചിയെ

ലണ്ടൻ: ഇന്ത്യയുടെ ലോകചാമ്പ്യൻ പി.വി.സിന്ധു ഓൾ ഇംഗ്ലണ്ട് ബാഡ്മിന്റൺ ചാമ്പ്യൻഷിപ്പിന്റെ സെമിയിൽ കടന്നു. ജപ്പാന്റെ ലോകോത്തര താരം അകാനേ യമാഗൂച്ചിയെയാണ് സിന്ധു തോൽപ്പിച്ചത്. 16-21, 21-16,21-19 എന്ന നിലയിലാണ് സിന്ധു നിർണ്ണായക ജയം സ്വന്തമാക്കിയത്.

ആദ്യ സെറ്റ് 16-21ന് കൈവിട്ട സിന്ധു അതേ നാണയത്തിൽ തിരിച്ചടിച്ചാണ് രണ്ടാം സെറ്റ് 21-16ന് തിരികെ പിടിച്ചത്. മൂന്നാം സെറ്റിൽ 21-19നാണ് ആവേശപ്പോരാട്ട ത്തിനൊടുവിൽ സിന്ധു ജയിച്ചത്.

സെമിഫൈനലിൽ സിന്ധുവിന്റെ എതിരാളി തായ്‌ലാന്റിന്റെ പോൺപാവേ ചോച്ചൂവാംഗാണ്. അമേരിക്കയുടെ ബീവെൻ സാംഗിനെ 21-16,21-19ന് തോൽപ്പിച്ചാണ് തായ് താരം സെമിയിലെത്തിയിരിക്കുന്നത്. രണ്ടാം സെമിയിൽ തായ്‌ലാന്റിന്റെ റാച്ചാനോക്ക് ഇന്റോണും ജപ്പാന്റെ ഓക്കുഹാരയും ഏറ്റുമുട്ടും.