കേരള ചരിത്രത്തിലെ ഏറ്റവും മികച്ച മുഖ്യമന്ത്രിയെ കണ്ടെത്താൻ ജനം ടിവി നടത്തുന്ന ഓൺലൈൻ പോൾ ഒരു ദിവസം പിന്നിടുമ്പോൾ ബഹുദൂരം മുന്നിലെത്തി കെ. കരുണാകരൻ. പോൾ ചെയ്ത വോട്ടുകളിൽ 26.53 ശതമാനം വോട്ടുകൾ നേടിയാണ് കെ.കരുണാകരൻ മുന്നിൽ നിൽക്കുന്നത്. 15.64 ശതമാനം വോട്ടുകളുമായി ഇ.കെ നായനാരാണ് രണ്ടാം സ്ഥാനത്തുള്ളത്.
സിപിഐ നേതാവും ജനകീയനായ മുഖ്യമന്ത്രിയെന്ന് പേരുകേട്ടയാളുമായ സി. അച്യുതമേനോൻ 13.22 ശതമാനം വോട്ടുകൾ നേടി മൂന്നാം സ്ഥാനത്തെത്തിയപ്പോൾ ഉമ്മൻ ചാണ്ടി 11.75 ശതമാനം വോട്ടുകൾ നേടി നാലാം സ്ഥാനത്തെത്തി. നിലവിലെ മുഖ്യമന്ത്രി പിണറായി വിജയനേക്കാൾ പട്ടം താണുപിള്ളയും വി.എസ് അച്യുതാനന്ദനും ആർ.ശങ്കറും വോട്ടുകൾ നേടിയിട്ടുണ്ട്.
മൊത്തം മൂന്ന് റൗണ്ടായാണ് വോട്ടെടുപ്പ്. ഓരോ റൗണ്ടിലും വോട്ടു ചെയ്യണം. രണ്ടാം ഘട്ടത്തിലേക്ക് കടക്കുമ്പോൾ കുറഞ്ഞവോട്ട് കിട്ടിയ 4 പേർ പുറത്താകും. അതിന് ശേഷം അവശേഷിക്കുന്ന 8 പേരിൽ നിന്ന് പ്രേക്ഷകർക്ക് 4 പേരെ തിരഞ്ഞെടുക്കാം. അന്തിമഘട്ടത്തിൽ തിരഞ്ഞെടുക്കപ്പെടുന്ന 4 പേരിൽ നിന്ന് വീണ്ടും പ്രിയപ്പെട്ട മുഖ്യമന്ത്രിയെ തിരഞ്ഞെടുക്കാം. കൂടുതൽ വോട്ട് കിട്ടുന്നയാൾ കേരളത്തിന്റെ എക്കാലത്തെയും ജനപ്രിയ മുഖ്യമന്ത്രിയായി തെരഞ്ഞെടുക്കപ്പെടും.
