ഓർലിയൻസ് മാസ്‌റ്റേഴ്‌സ്: സൈന സെമിയിൽ; ശ്രീകാന്ത് പുറത്ത്

പാരീസ്: ഓർലിയൻസ് മാസ്‌റ്റേഴ്‌സ് ബാഡ്മിന്റണിൽ ഇന്ത്യയുടെ സൈന നെഹ്വാൾ സെമിയിൽ പ്രവേശിച്ചു. അതേസമയം പരുഷവിഭാഗത്തിൽ പ്രതീക്ഷയായിരുന്ന കിഡംബി ശ്രീകാന്ത് ക്വാർട്ടറിൽ പുറത്തുപോയി.

മൂന്ന് സെറ്റുകളുടെ പോരാട്ടത്തിലാണ് സൈന ജയം സ്വന്തമാക്കിയത്. അമേരിക്കയുടെ ഐറിസ് വാങ്ങിനെയാണ് സൈന തോൽപ്പിച്ചത്. 21-19, 17-21, 21-19 എന്ന സ്‌കോറിനാണ് സൈന സെമി ഉറപ്പിച്ചത്. കഴിഞ്ഞ ജനുവരിയിൽ ഇന്തോനേഷ്യ മാസ്‌റ്റേഴ്‌സിലും സൈന സെമിയിലെത്തിയിരുന്നു.

പുരുഷ വിഭാഗത്തിൽ കിഡംബി ശ്രീകാന്ത് ഫ്രാൻസിന്റെ തോമാ പോപ്പോവിനോടാണ് അടിയറ പറഞ്ഞത്. 21-19, 21-17 എന്ന സ്‌കോറിനാണ് പോപ്പോവ് ഇന്ത്യൻ താരത്തെ മറികടന്ന് സെമിയിലെത്തിയത്.

സൈനയ്‌ക്കൊപ്പം വനിതാ ഡബിൾസിൽ അശ്വിനി പൊന്നപ്പ സിക്കി റെഡ്ഡി സഖ്യവും സെമിയിലെത്തി. ഇംഗ്ലണ്ടിന്റെ കോളേ ബിർച്ച- ലൗറാ സ്മിത്ത് സഖ്യത്തെയാണ് അശ്വിനി-സിക്കി സഖ്യം തോൽപ്പിച്ചത്.ഒളിമ്പിക്‌സ് യോഗ്യതയ്‌ക്കായി പരിഗണിക്കുന്ന പ്രധാന ടൂർണ്ണമെന്റുകളിലൊന്നാണ് ഓർലിയൻസ്.