കുട്ടികളില്‍ പ്രധാനമായും കണ്ടു വരുന്ന ഒന്നാണ് വൈറ്റമിന്‍ ഡിയുടെ കുറവ്. ഇത് തുടക്കത്തില്‍ തന്നെ കണ്ടെത്തുകയും വേണ്ട ചികിത്സ നല്‍കുകയും ചെയ്തില്ലെങ്കില്‍ പിന്നീട് ഗുരുതരമായ ആരോഗ്യ പ്രശ്‌നങ്ങള്‍ ഉണ്ടാകാന്‍ കാരണമാകുന്നു. സൂര്യപ്രകാശത്തിലൂടെയും ചില ഭക്ഷണങ്ങളിലൂടെയും ലഭിയ്ക്കുന്ന ഇതിന്റെ കുറവ് ഇന്നത്തെ തലമുറയില്‍ ഗുരുതരമായ ആരോഗ്യ പ്രശ്നങ്ങളുണ്ടാക്കുന്നു. കുട്ടികളിൽ എല്ലിന്റെയും മറ്റും വളര്‍ച്ചയെ ഇതു ബാധിയ്ക്കും. ഗര്‍ഭിണിയില്‍ വൈറ്റമിന്‍ ഡി കുറവെങ്കില്‍ ഗര്‍ഭസ്ഥ ശിശുവിനെ ഇത് ദോഷകരമായി ബാധിക്കും.
വൈറ്റമിന്‍ ഡിയുടെ കുറവ് കാരണം കുട്ടികള്‍ നടക്കാന്‍ വൈകുകയോ അല്ലെങ്കില്‍ നടക്കാന്‍ ബുദ്ധിമുട്ട് കാണിക്കുകയോ ചെയ്യുന്നു. കുട്ടികളിലെ വളര്‍ച്ചയെന്നു പറയുന്നത് എല്ലിന്റെ വളര്‍ച്ചയാണ്. എല്ലിന് നീളം വയ്ക്കുമ്പോഴാണ് കുട്ടികള്‍ക്ക് ഉയരം വയ്ക്കുന്നത്. കുട്ടികളുടെ വളര്‍ച്ച മുരടിപ്പിയ്ക്കുന്ന ഒന്നാണ് വൈറ്റമിന്‍ ഡിയുടെ കുറവ്. കാല്‍സ്യം എല്ലിന്റെ വളര്‍ച്ചയ്ക്ക് ഏറെ അത്യാവശ്യമാണ്. കാല്‍സ്യം എത്ര തന്നെ ശരീരത്തില്‍ എത്തിയാലും ഇത് ശരീരത്തിന് ആഗിരണം ചെയ്യണമെങ്കില്‍ വൈറ്റമിന്‍ ഡി അത്യാവശ്യമാണ്. വൈറ്റമിന്‍ ഡി കുറവ് കുട്ടികള്‍ക്ക് എല്ലിനു പെട്ടെന്നു തന്നെ കേടുപാടുകള്‍ ഉണ്ടാകാന്‍ ഇടയാക്കും.
അതായത് കുട്ടികളുടെ ശാരീരിക വളര്‍ച്ചയിലും വൈററമിന്‍ ഡി പ്രധാനം തന്നെയാണ്. കുട്ടികളിലെ മസില്‍ വേദനയ്ക്കുള്ള പ്രധാനപ്പെട്ട കാരണങ്ങളില്‍ ഒന്നാണ് വൈറ്റമിന്‍ ഡി. ഇതിന്റെ അഭാവം മസിലിനു കരുത്തു കുറയ്ക്കും. പല്ലിനും വൈററമിന്‍ ഡിയുടെ കുറവ് ദോഷം വരുത്തും. അണുബാധകള്‍ പെട്ടെന്നു തന്നെ കുട്ടിയെ പിടികൂടും. വൈറ്റമിന്‍ ഡി കുറവെങ്കില്‍ പെട്ടെന്നു തന്നെ രോഗങ്ങള്‍ വരാന്‍ കാരണമാകും. വൈറ്റമിന്‍ ഡി കുട്ടികളില്‍ രോഗപ്രതിരോധ ശേഷിക്കും ഏറെ പ്രധാനമാണ്.
Comments