കുംഭമേള അവസാനിപ്പിക്കുകയാണെന്ന് ജൂന അഖാഡ

ഹരിദ്വാർ ; കുംഭമേളയിലെ ചടങ്ങുകൾ അവസാനിപ്പിക്കുകയാണെന്ന് പ്രമുഖ അഖാഡകളിലൊന്നായ ജൂന അഖാഡ. പ്രധാനമന്ത്രി നരേന്ദ്രമോദിയുടെ അഭ്യർത്ഥന അനുസരിച്ചാണ് ജുന അഖാഡയുടെ ചടങ്ങുകൾ അവസാനിപ്പിക്കുന്നതെന്ന് സ്വാമി അവധേശാനന്ദ് ഗിരി അറിയിച്ചു. പൊതുനന്മയ്‌ക്ക് വേണ്ടിയുള്ള ഒരു ആവശ്യവും നിരസിക്കില്ലെന്നും അദ്ദേഹം വ്യക്തമാക്കി.

മറ്റ് വിഭാഗങ്ങളും തങ്ങളെപ്പോലെ കുംഭമേളയിലെ ചടങ്ങുകൾ അവസാനിപ്പിക്കുമെന്ന് കരുതുന്നു. രാജ്യത്തിന്റെയും ജനങ്ങളുടേയും നിലനിൽപ്പാണ് പ്രധാനമെന്നും അദ്ദേഹം വ്യക്തമാക്കി. കുംഭമേളയിലെ ചടങ്ങുകൾ പ്രതീകാത്മകമാക്കണമെന്നും കൂടുതൽ ആളുകൾ പങ്കെടുക്കുന്നത് ഒഴിവാക്കണമെന്നും പ്രധാനമന്ത്രി നരേന്ദ്രമോദി സ്വാമി അവധേശാനന്ദ ഗിരിയെ ഫോണിൽ വിളിച്ച് അഭ്യർത്ഥിച്ചിരുന്നു. ഇതേ തുടർന്നാണ് തീരുമാനം.

രാജ്യത്ത് കൊറോണ കേസുകൾ വളരെ കുറഞ്ഞതോടെയാണ് കുംഭമേള നടത്താനുള്ള തീരുമാനവുമായി അഖാഡകൾ മുന്നോട്ടു പോയത്. സർക്കാരും പൂർണ സംവിധാനങ്ങളും കൊറോണ നിയന്ത്രണങ്ങളും നടപ്പിലാക്കിയിരുന്നു. എന്നാൽ കുംഭമേള ആരംഭിച്ച് ദിവസങ്ങൾക്ക് ശേഷം രാജ്യത്ത് കൊറോണ രോഗവ്യാപനം വർദ്ധിച്ചതോടെയാണ് കുംഭമേള അവസാനിപ്പിക്കണമെന്ന ആവശ്യം ഉയർന്നത്. ഉത്തരാഖണ്ഡിൽ കൊറോണ വ്യാപനം രൂക്ഷമല്ലെങ്കിലും രാജ്യത്തെ സ്ഥിതി പരിഗണിച്ചാണ് തീരുമാനം.