രാജ്യം കൊറോണയെന്ന മഹാമാരിയുടെ രണ്ടാംതരംഗത്തില്‍ നിന്നും കരകയറാനുളള പരിശ്രമത്തിലാണ്. ഈ മഹാമാരിയുടെ വ്യാപനം തടയുന്നതിന്റെ ഭാഗമായി രാജ്യത്തിന്റെ പല ഭാഗങ്ങളും വീണ്ടും ലോക്ക്ഡൗണിലേക്ക് നീങ്ങി. ഈ സാഹചര്യത്തിലും മിക്ക ആളുകള്‍ക്കും ജോലി ഭാരം ഒട്ടും കുറയുന്നില്ല. വര്‍ക്ക് ഫ്രം ഹോം എന്ന സമ്പ്രദായം ആരംഭിച്ചതോടെ കമ്പ്യൂട്ടറുകള്‍ക്ക് മുന്നില്‍ മണിക്കൂറുകള്‍ ചെലവഴിക്കുന്നവരുടെ എണ്ണവും കൂടിയിട്ടുണ്ട്. പക്ഷെ ഇത്തരത്തില്‍ കമ്പ്യൂട്ടറുകള്‍ക്ക് മുന്നില്‍ കൂടുതല്‍ സമയം ചെലവഴിക്കുന്നതോടെ കഴുത്തിനും ശരീരത്തും മറ്റും വേദന അനുഭവപ്പെടുന്നത് സ്വാഭാവികം.
കമ്പ്യൂട്ടറിന്റെ അമിതമായ ഉപയോഗം മൂലം മാത്രമല്ല, മറിച്ച് കമ്പ്യൂട്ടറിന് മുന്നിലുള്ള തെറ്റായ രീതിയിലുള്ള ഇരിപ്പ് ഉള്‍പ്പടെ കഴുത്തു വേദനയ്‌ക്കു കാരണമാകും. വ്യായാമത്തിന്റെ കുറവ് മൂലവും ചിലരില്‍ കഴുത്തു വേദന ഉണ്ടാകാറുണ്ട്. കഴുത്തിലെ കശേരുക്കള്‍ക്കു തേയ്മാനം വരുന്നത് മൂലം ഉണ്ടാകുന്ന സെര്‍വിക്കല്‍ സ്പോണ്ടിലോസിസിന്റെ പ്രധാന ലക്ഷണവും കഴുത്ത് വേദനയാണ്.എന്നാല്‍ എങ്ങനെയാണ് ഈ പ്രശ്‌നങ്ങള്‍ പരിഹരിച്ച് മുന്നോട്ട് പോകുക. ഇതിനായി ആദ്യം കമ്പ്യൂട്ടറിന് മുന്നിലുള്ള ഇരിപ്പ് ശരിയായ രീതിയിലാക്കണം.
കമ്പ്യൂട്ടറിന് മുന്നില്‍ ഇരിക്കുമ്പോള്‍ നടുവും തലയും നിവര്‍ത്തി വേണം ഇരിക്കാന്‍. കണ്ണുകള്‍ കമ്പ്യൂട്ടറിന്റെ സ്‌ക്രീനിന് നേരേ വരാത്ത രീതിയില്‍ ആയിരിക്കണം കസേരയുടെ ഉയരം. കാല്‍ മുട്ടുകള്‍ ഇടുപ്പിനു തൊട്ടു താഴെവരത്തക്കവിധം കാല്‍ തറയില്‍ നിന്നും ഉയര്‍ത്തിവയ്‌ക്കണം.ഒരു നിശ്ചിത സമയം ഇടയ്‌ക്കിടെ ഇടവേള എടുക്കേണ്ടത് അനുവാര്യമാണ്. കഴുത്ത് വേദനയ്‌ക്ക് പരിഹാരം കാണാനായി കഴുത്തിന്റെ ചലനശേഷിക്കായുള്ള വ്യായാമങ്ങള്‍ ശരിയായി പിന്തുടരുകയും ചെയ്യുക.
Comments