ഇരട്ട ജനിതകമാറ്റം സംഭവിച്ച കൊറോണ വൈറസിനെ ഇല്ലാതാക്കും; കൊവാക്‌സിന്റെ ഫലപ്രാപ്തി വ്യക്തമാക്കി പഠനം

ന്യൂഡൽഹി : കൊറോണ വൈറസിന്റെ വകഭേദങ്ങളെയും ഫലപ്രദമായി ചെറുക്കാൻ പ്രതിരോധ വാക്‌സിനായ കൊവാക്‌സിന് കഴിയുമെന്ന് കണ്ടെത്തൽ. ഐസിഎംആറും, നാഷണൽ ഇൻസ്റ്റിറ്റ്യൂട്ടുമായും ചേർന്ന് ക്ലിനിക്കൽ ഇൻഫെക്ഷ്യസ് ഡിസീസ് നടത്തിയ പഠനത്തിലാണ് കണ്ടെത്തൽ. ഇരട്ട ജനിതകമാറ്റം സംഭവിച്ച ബി.1.617, ബി.1.1.7 എന്നീ വൈറസുകളെ മികച്ച രീതിയിൽ പ്രതിരോധിച്ചതായി പഠനത്തിൽ വ്യക്തമാക്കുന്നു.

ക്ലിനിക്കൽ ഇൻഫെക്ഷ്യസ് ഡിസീസിന്റെ പ്രസിദ്ധീകരണത്തിലാണ് ഇതുമായി ബന്ധപ്പെട്ട വിവരങ്ങൾ പുറത്തുവിട്ടിരിക്കുന്നത്. യുകെയിലും, ഇന്ത്യയിലും കണ്ടെത്തിയ കൊറോണയുടെ ബി.1.617. ബി.1.1.7 എന്നീ വൈറസുകളെ കൊവാക്‌സിൻ നശിപ്പിച്ചതായി പ്രസിദ്ധീകരണത്തിൽ പറയന്നു.

നേരത്തെ കൊറോണയുടെ വക ഭേദങ്ങളെ പ്രതിരോധിക്കാനുള്ള ശേഷി കൊവാക്‌സിന് ഉണ്ടെന്ന് കേന്ദ്ര ആരോഗ്യമന്ത്രി ഹർഷവർദ്ധൻ വ്യക്തമാക്കിയിരുന്നു. ഇതിന് പിന്നാലെയാണ് പഠനത്തിലൂടെ ഇക്കാര്യം തെളിയിക്കപ്പെടുന്നത്.

ഹൈദരാബാദ് ആസ്ഥാനമായി പ്രവർത്തിക്കുന്ന ഭാരത് ബയോടെക് ആണ് കൊവാക്‌സിൻ നിർമ്മിച്ചിരിക്കുന്നത്.