മുംബൈ: ശ്രീലങ്കൻ പര്യടനത്തിനുള്ള ഇന്ത്യൻ ക്രിക്കറ്റ് ടീമിനെ പ്രഖ്യാപിച്ചു. മൂന്ന് ഏകദിനങ്ങളും മൂന്ന് ടി20 മത്സരങ്ങളുമാണ് ടീം ഇന്ത്യ കളിക്കുക. മലയാളി താരം സഞ്ജു സാംസൺ മടങ്ങിയെത്തി എന്നതാണ് സവിശേഷത. ഐ.പി.എല്ലിൽ രാജസ്ഥാന്റെ നായകനായി ബാറ്റിംഗിൽ നടത്തിയ മികച്ച പ്രകടനമാണ് സഞ്ജുവിന് ഗുണമായത്. മറ്റൊരു മലയാളി താരവും ബാറ്റിംഗ് പ്രതിഭയുമായ കർണ്ണാടകയുടെ ദേവ്ദത്ത് പടിക്കലും ടീമിലിടം നേടി.
ശിഖർധവാൻ നായകനായാണ് ടീം ഇന്ത്യയുടെ യുവനിര ശ്രീലങ്കയിൽ കളിക്കുന്നത്. പേസ് ബൗളർ ഭുവനേശ്വർകുമാറാണ് ടീമിന്റെ വൈസ് ക്യാപ്റ്റൻ. വിക്കറ്റ് കീപ്പറായി സഞ്ജുവിനൊപ്പം മികച്ച ബാറ്റ്‌സ്മാൻ കൂടിയായ ഇഷാൻ കിഷനും ടീമിലുണ്ട്. രാജസ്ഥാൻ റോയൽസിന്റെ യുവ പേസർ ചേതൻ സക്കറിയ അപ്രതീക്ഷിതമായി അവസരം ലഭിച്ച താരമായി.
ഹാർദ്ദിക് പാണ്ഡ്യ, സൂര്യകുമാർ യാദവ്, ക്രുനാൽ പാണ്ഡ്യ എന്നിവരും ബാറ്റിംഗ് കരുത്തായി ടീമിലുണ്ട്. നെറ്റ് ബൗളറായി മലയാളി താരം സന്ദീപ് വാര്യർ, അർഷദീപ് സിംഗ്, ഇഷാൻ പൊറൽ, സായ് കിഷോർ, സിമർജിത് സിംഗ് എന്നിവരേയും തിരഞ്ഞെടുത്തിട്ടുണ്ട്.
