ഇതര സംസ്ഥാനങ്ങളെ അധിക്ഷേപിച്ച് സിപിഎം എം.എൽ.എ ; തൊഴിലാളികൾക്ക് അരി മേടിക്കണമെങ്കിൽ കേരളത്തിൽ വരണം ; ശ്രീനിജൻ

‌തിരുവനന്തപുരം : ഇതര സംസ്ഥാനങ്ങളെ അധിക്ഷേപിച്ച് കുന്നത്തുനാട് എം.എൽ.എയും സിപിഎം നേതാവുമായ പി.വി ശ്രീനിജൻ. കിറ്റക്സ് കമ്പനി തെലങ്കാനയിൽ പോയതിന്റെ സാഹചര്യത്തിലാണ് ആക്ഷേപവുമായി ശ്രീനിജൻ രംഗത്തെത്തിയത്. മറ്റ് സംസ്ഥാനങ്ങളിലെ തൊഴിലാളികൾ അരി മേടിക്കാൻ കേരളത്തിൽ പണിയെടുക്കേണ്ടത് എന്തുകൊണ്ടെന്ന ചോദ്യമുള്ള പോസ്റ്ററാണ് ശ്രീനിജൻ ഫേസ്ബുക്കിൽ ഷെയർ ചെയ്തത്.

വലിയ കമ്പനികളെല്ലാം അന്യസംസ്ഥാനങ്ങളിൽ. പക്ഷേ അന്യ സംസ്ഥാന തൊഴിലാളിക്ക് അരി മേടിക്കണമെങ്കിൽ കേരളത്തിൽ പണിയെടുക്കണം അതെന്താ അങ്ങനെ. എന്നാണ് പോസ്റ്ററിൽ എഴുതിയിരിക്കുന്നത്. ശ്രീനിജന്റെ പോസ്റ്ററിനെതിരെ ശക്തമായ പ്രതിഷേധമാണ് സാമൂഹ്യ മാദ്ധ്യമങ്ങളിൽ ഉയരുന്നത്. ഏറ്റവും കൂടുതൽ പ്രവാസികൾ ഉള്ള സംസ്ഥാനമാണ് കേരളമെന്ന് എം.എൽ.എ മറന്നു പോകരുതെന്ന പരിഹാസ കമന്റുകളാണ് മറുപടിയായി ലഭിക്കുന്നത്.

അവിദഗ്‌ദ്ധ ജോലിക്കാണ് ആളുകൾ കേരളത്തിൽ വരുന്നത്. വിദഗ്‌ദ്ധ ജോലിക്കാർ ആരും കേരളത്തിൽ വരുന്നില്ല. അവരൊക്കെ കേരളത്തിന് പുറത്തേക്കാണ് പോകുന്നത്. ഇത്തരം ഡയലോഗുകൾ അടിക്കുമ്പോൾ ഇതൊക്കെയൊന്ന് കണക്കിലെടുക്കണമെന്നും കമന്റുകളിൽ ആവശ്യപ്പെടുന്നു.ബോംബയിലും ,ഡൽഹിയിലും ,മറ്റു ഉത്തരേന്ത്യൻ നഗരങ്ങളിലും ലക്ഷക്കണക്കിന് മലയാളികൾ പണി എടുക്കുന്നുണ്ടല്ലോ അത് എന്താണ് പറയാത്തതെന്ന ചോദ്യവും കമന്റുകളിൽ ഉണ്ട്.