ഓൺലൈനിൽ ഓർഡർ ചെയ്ത സാധനങ്ങൾ ഡ്രൈവറില്ലാ കാറിൽ വീട്ടിലെത്തും; പുതിയ സംവിധാനവുമായി വാൾമാർട്ട്; വീഡിയോ കാണാം..

വാഷിങ്ടൺ: ഓൺലൈനായി ഓർഡർ ചെയ്താൽ സാധനങ്ങൾ വീട്ടുമുറ്റത്ത് വരുന്നത് പുതിയ പ്രതിഭാസമല്ല. എന്നാൽ അവയെത്തുന്നത് ഡ്രൈവറില്ലാത്ത വണ്ടിയിലാണെങ്കിലോ..? സംഗതി പ്രേതബാധയാണെന്ന് ആരും തെറ്റിദ്ധരിക്കേണ്ട.. അമേരിക്കയിൽ തങ്ങളുടെ ഉപഭോക്താക്കൾക്കായി വാൾമാർട്ട് ഒരുക്കിയ പുതിയ സാധ്യതയാണ് ഫോർഡിന്റെ ഈ ഓട്ടോമാറ്റിക് ഡെലിവറി സംവിധാനം.

Customers may soon get their Walmart orders delivered by an autonomous vehicle. Self-driving startup Argo AI, automaker Ford Motor and Walmart will together launch the service in Miami, Austin, and Washington, D.C. https://t.co/RM7TjZnsit pic.twitter.com/X0GGcmoPOp

— Reuters (@Reuters) September 16, 2021

അമേരിക്ക ആസ്ഥാനമായി പ്രവർത്തിക്കുന്ന അന്താരാഷ്‌ട്ര റീട്ടെയിൽ കോർപ്പറേഷനാണ് വാൾമാർട്ട്. വാൾമാർട്ടിന്റെ കീഴിൽ നിരവധി ഹൈപ്പർമാർക്കറ്റുകളാണ് ആഗോളതലത്തിൽ പ്രവർത്തിക്കുന്നത്. ഇപ്പോൾ വാൾമാർട്ടിൽ നിന്നും ഓൺലൈനായി ബുക്ക് ചെയ്യുന്നവർക്ക് വീട്ടിൽ സാധനങ്ങൾ എത്തിക്കാൻ ഒരുങ്ങുകയാണ് ഫോർഡിന്റെ ഓട്ടോമാറ്റിക് കാർ. ആർഗോയുടെ ആർട്ടിഫിഷ്യൽ ഇന്റലിജൻസ് സാങ്കേതിക വിദ്യ ഫോർഡിൽ പ്രയോഗിച്ചാണ് ഡ്രൈവറില്ലാ-വാഹനത്തെ വാൾമാർട്ട് ഒരുക്കുന്നത്.

അമേരിക്കയിലെ വാഷിങ്ടൺ, മിയാമി, ഓസ്റ്റിൻ എന്നിവിടങ്ങളിലാണ് വാൾമാർട്ടിന്റെ ഓട്ടോമാറ്റിക് വാഹന സംവിധാനം ആദ്യം അവതരിപ്പിക്കുന്നത്. തുടക്കത്തിൽ നിശ്ചിത ഭൂപ്രദേശങ്ങളിലാണ് പുതിയ സാധ്യത ആരംഭിക്കുക. കാലക്രമേണ വിവിധയിടങ്ങളിലേക്ക് ഇത് വ്യാപിപ്പിക്കുമെന്നും വാൾമാർട്ട് അറിയിച്ചു. 2022ഓടെ പുതിയ സംവിധാനം പ്രാബല്യത്തിൽ വരുമെന്നാണ് കമ്പനി പ്രതീക്ഷിക്കുന്നത്.