ന്യൂഡൽഹി:രാജ്യത്തിന്റെ ഹൃദയം കീഴടക്കികൊണ്ട് വയോധികന്റെ ഗാനാലാപനം.രാജ്യത്ത് തൊണ്ണൂറുകളിൽ പ്രക്ഷേപണം ചെയ്തിരുന്ന മഹാഭാരതം എന്ന ഇതിഹാസ പുരാണ പരമ്പരയുടെ ശീർഷക ഗാനം പാടിക്കൊണ്ടാണ് മുസ്ലീം വയോധികൻ ആസ്വാദകരുടെ മനം കവരുന്നത്.
ഇന്ത്യയുടെ മുൻ തിരഞ്ഞെടുപ്പ് കമ്മീഷ്ണറായ ഡോ.എസ്.വൈ ഖുറേഷി ടിറ്റ്വറിൽ പങ്കുവെച്ച വീഡിയോയാണ് സമൂഹമാദ്ധ്യമങ്ങൾ ഏറ്റെടുത്തിരിക്കുന്നത്. ഇതിനോടകം തന്നെ ലക്ഷക്കണക്കിന് വ്യൂസും ലൈക്കുമാണ് വീഡിയോയ്‌ക്ക് ലഭിച്ചിരിക്കുന്നത്.
വാർപ്പുമാതൃകകളെ തച്ചുടയ്‌ക്കുക എന്ന കുറിപ്പോടെയാണ് അദ്ദേഹം വീഡിയോ പങ്കുവെച്ചിരിക്കുന്നത്. രാജ്യത്തിന്റെ നാനാഭാഗത്തുനിന്നും നിരവധി പേരാണ് വയോധികന്റെ ഗാനാലാപനത്തെ പ്രശംസിച്ച് രംഗത്തെത്തിയിരിക്കുന്നത്.
വർഷങ്ങൾക്ക് മുൻപ് രാജ്യത്ത് ദൂരദർശനിലൂടെ പ്രക്ഷേപണം ചെയ്ത ഇതിഹാസ പുരാണപരമ്പര ആണ് മഹാഭാരതം. മഹത്തായ പുരാണകഥയെ അടിസ്ഥാനമാക്കി ബിആർ ചോപ്ര സംവിധാനം ചെയ്ത ഷോ നിരവധി പേരാണ് അന്ന് ഭക്തിപുരസ്‌രം കണ്ടിരുന്നത്. മഹേന്ദ്ര കപൂർ പാടിയ ഷോയുടെ ശീർഷകഗാനവും അന്ന് ജനങ്ങൾ ഏറ്റെടുത്തിരുന്നു.ഇത് വീണ്ടും ഒരു മുസ്ലീം വയോധികൻ പാടിയത് നിറഞ്ഞ കൈയ്യടികളോടെയാണ് ആളുകൾ സ്വീകരിച്ചത്. ഗൃഹാതുരത്വത്തിലേക്ക് കൂട്ടികൊണ്ട് പോയതിന് നന്ദി പറഞ്ഞുകൊണ്ട് ഏറെ പേരാണ് വീഡിയോ സമൂഹമാദ്ധ്യമങ്ങളിൽ പങ്കു വെച്ചിരിക്കുന്നത്.
